یا ژ هەژی یە بەروارا (١١)ێ ئیلۆنێ ببیتە ڕۆژا نیشتیمانی یا پێشمەرگەی
دلهین حەمدی
ئەڤە ئەو بەروارە یاكو شۆڕشا ئیلۆنا مەزن تێدا هاتیە بەرپاكرن بەری (٦٤) سالان كو شۆڕشەكا (سیاسی، جڤاكی، چەكداری، هزری…هتد) بوو هەروەسا ڤێ شۆڕشێ مێژوویەكا نوی دروستكر و ئومێد ئێخستە د ناڤ دلێ نەتەوەیەكێ دا و كەلهەك بوو ژ بۆ ئازادیخواز و دیموكراتیخوازان ل دەڤەرێ و جهێ سەرنج و هەلسەنگاندنێ بوو ل سەر ئاستێ نیڤدەولەتی و هەرێمی ب گشتی.
ل (١١)ی ئیلۆنا (١٩٦١)ێ ب ڕێبەراتیا نەمر (مەلا مستەفایێ بارزانی) ئەڤ شۆڕشە هاتە بەرپاكرن و ئیرادە و ڕەتكرنا بندەستیێ د ناخێ تاك ب تاكێن كوردستانێ دا ئاڤاكر، بەرپاكرنا ڤێ شۆڕشێ بۆ وێ چەندێ ڤەدگەڕیت كو ڕژێما (عبدالكریم قاسم)ی ژ وان هەمی سۆزان پاشگەز دبیت یێن كو ب سەركردایەتیا سیاسی یا كوردستانێ دابوون و ل دەسپێكێ ڤێ ڕژێمێ پێنگاڤێن باش هاڤێن و هەلوەستێ وێ یێ ئەرێنی بوو لێ پاشی كەفتە د بن كاریگەریا هزرا ناسیۆنالیزما عەرەبی دا و پەشیمان دبیت ژ وان سۆزێن ب سەركردایەتیا سیاسی یا كوردستانێ دابوون و پەلامارا كوردستانێ دا و بارزانیێ نەمر ژی ل ژێر ناڤێ (شۆڕشا ئیلۆنێ) و ب هیممەتا خەلك و پێشمەرگەیێن دلێرێن كوردستانێ بەر سینگێ ڕژێما قاسمی گرتن و ڤێ شۆڕشێ نێزیكی (١٤) ساڵان ڤەكێشا و د ئەنجام دا ڕێكەفتنا (١١ی ئادارا ١٩٧٠) لێ هاتە بەرهەم كو ب ڕویدانەكا مەزن دهاتە هەژماركرن د دیرۆكا ڕزگاریخوازا گەلێ كورد دا چونكی بۆ ئێكەم جار بوو د مێژوویێ دا دەڤەرەكا ئۆتونۆمی یا دان پێ دانایی ل باشۆرێ كوردستانێ درست دبیت و زمانێ كوردی مل ب ملێ زمانێ عەرەبی ب فەرمی هاتە نیاسین پاشی وەك پیشەیەكێ هەردەمی ڕژێما بەعسی ل پەیمان و سۆزێن خۆ پاشگەز دبیت و شەڕێ دژی كورد كوردستانیان دەستپێكر و هەوا ئەنفال و قڕكرنێ ل دژی گەلێ كورد ب ئەنجام گەهاندن و ل سالا (١٩٧٥)ێ كۆچا خەلكێ باشورێ كوردستانێ بۆ وەلاتێن دەوروبەر بتایبەتی توركیا و ئیرانێ دەستپێكر، ژ هەژی گوتنێ یە تایبەتمەندیێن شۆڕشا ئیلۆنا مەزن هند زۆرن و ئەوا مە بەحس كری بتنێ هندەك دلۆپن ژ وێ دەریایا شانازی و سەروەریا ڤێ شۆڕشێ و دڤێت توێژا گەنجان و نفشێ خۆ یێ نوكە ژی لسەر وێ چەندێ پەروەردە بكەین كو هەرگاڤ ڕێزێ ل دیرۆكا گەلێ خۆ بگرن و نەهامەتی و دەردەسەریێن باب و باپیرێن خۆ ژبیرنەكەن و بەر ب خزمەتكرنا خاك و وەلاتێ خۆ پێنگاڤان بەرەف پێش بهاڤێژن و شیانێن خۆ بۆ پتر خزمەتكرنا گەل و وەلات و شارستانیەتا خۆ بمەزێخن.
ب ڤێ چەندێ خۆیا دبیت كو شۆڕشا ئیلۆنا مەزن دبیتە ئێكەم مەزنترین شۆڕش د دیرۆكا بزاڤا ڕزگاریخوازا گەلێ كورد دا و ئێكەم دەسكەفتێ وێ یێ مەزن بدەستڤەئینانا حوكمێ ئوتونومی بوو ب حنێرا پێشمەرگەی و پشتەڤانیا جەماوەری، ل ڤێرێ پێشنیاز دكەین كو ئەڤ رۆژە واتە (١١ی ئیلۆنێ) كو خۆدان تایبەتمەندییەكا پیرۆزە ب رۆژا نیشتیمانی یا پێشمەرگەی بهێتە نیاسین و پێگیری پێ بهێتە كرن داكو نەوەیێ داهاتیێ گەلێ مە ئاشنا ببن ب ڤان پیرۆزیان و ژبیر نەكەن.
ل دویماهیكێ سەرێ ڕێز و نەوازشێ بۆ گیانێ پاكێ شەهیدێن ڕێیا ڕزگاریخوازا گەلێ كورد و سەركاروانێ وان بارزانیێ باب و كاك ئیدریسێ هەردەم زیندی دچەمینین.
