یا گرنگ نینە كی بەربژارە یا گرنگ ئەوە تو دێ كێ هەلبژێری.؟!
نـۆرا جەعفەر شیمۆ
پەڕلەمان سازیەكا یاسادانانێ یە كو ئیرادەیا گەل نیشاددەت، ژ كۆمەكا ئەندامان پێكدهێت كو ژلایێ گەل ڤە ب ڕێكا هەلبژارتنان دهێنە دەستنیشانكرن، كو كارێ وێ دروستكرنا یاسایان و سەرپەرشتیكرنا حوكمەتێ و پەسەندكرنا بودجەی و دنانوستاندن ل سەر بڕێڤەبرنا دەولەتێ.
پەڕلەمانێ ئیراقێ، ب شێوەیەكێ گشتی ل ساڵا ٢٠٠٣ دهێتە ناڤبرن پشتی نەمانا سیستەمێ دكتاتۆری یێ (سەدام حسێن) كو سیستەمەكێ نوو یێ حوكمڕانیێ ل ئیراقێ هاتەدانان كو ب سیستەمێ (فیدڕالی، دیموكڕاتی، پەڕلەمانی)، دهێتە ناڤبرن ل دویڤ دەستوورێ نوێ یێ ئیراقێ ل سالا ٢٠٠٥ پەیڕەوبوو.
پەڕلەمانێ ئیراقێ هەتا نوكە د پێنچ خولێن یاسایی دا دەربازبوویە، كو خولا ئێكێ ( ٢٠٠٦ – ٢٠١٠)ـ خولا دویێ (٢٠١٠ – ٢٠١٤) خولا سیێ (٢٠١٤ – ٢٠١٨) خولا چارێ ( ٢٠١٨ – ٢٠٢١) خولا پێنجێ (٢٠٢١ – هەتا نها)، د پەڕلەمانێ ئیراقێ دا هەر چار سالان جارەكێ هەلبژارتن دهێنە ئەنجامدان.
ل دویڤ دەستوورێ هەمیشەیی یێ دەولەتا ئیراقێ كو ل سالا ٢٠٠٥ هاتیەدانان د ماددەیێ (١١٧) دەقێ وێ ئاماژە ب هندێ ددەت كو (ئەڤ دەستوورە دانپێدانێ ب هەرێما كوردستانێ دكەت ب دەستهەلاتێن وێ وەك هەرێمەكا فیدرالی)، ل ڤێرە دیاردبیت كو هەرێما كوردستانێ مافێ ڕەوا یێ هەی كو د بڕێڤەبرنا پەڕلەمانێ ئیراقێ دا پشكدار بیت ژبۆ پاراستنا مافێ گەلێ كورد.
پشكا هەرێما كوردستانێ ل پەڕلەمانێ ئیراقێ ب شێوەیەكێ یاسایی هاتیە دیاركرن، هەرێما كوردستانێ خودان ٥٨ كورسیایە ل ژێر ٣٢٩ كورسیێن گشتی یێن پەڕلەمانی.
هەرێما كوردستانێ خودان سیستەمەكێ دیموكڕاتیە ئەڤەژی وێ چەندێ ددەتە دیاركرن كو هەموو تەخ و چینان مافێ بەربژاریێ هەیە ژبۆ وێ چەندێ خۆ كاندید بكەت داكو بچیتە د ناڤا پەڕلەمانی دا.
د ڤێرەدا نە یا گرنگە كی بەربژارە یا گرنگ ئەوە تو دێ كێ هەلبژێری!، ژبەر كو هیچ بەربژارەك بێی ڕازەمەندی و دەنگێن گەل ماف نینە بچیتە د ناڤا پەڕلەمانی دا، ئەو كەسێن دهێنە هەلبژارتن نوونەرێن گەلن و كارێ وان پاراستنا مافێن گەلێ كوردە د پەڕلەمانی دا، هەر ژبەر ڤێ چەندێ داكو مافێن گەلێ كورد نەهێنە پێشێلكرن، پێدڤیە دەنگدەر وان كەسان دەستنیشان بكەت یان هەلبژێرن یێن كو شیان هەیین مافێ گەلێ كورد بپارێزیت ل ناڤا پەڕلەمانێ ئیراقێ دا.
د نوكە دا كێم دەم مایە ژبۆ هەلبژارتنێن خولا شەش یا پەڕلەمانێ ئیراقێ، لەوما یا گرنگە ژبۆ هەلبژارتنێن خولا شەشێ یا پەڕلەمانێ ئیراقێ دەنگدەر كەسێن دانا و زانا دەستنیشان بكەن یان هەلبژێرن داكو پاراستنێ ل مافێن گەلێ كورد بكەن و د هەمان دەم دا پێدڤیە خۆ ژ لایەنێ عەشیرەتگەریێ و ڕەشوە و خزم و هەڤالینیێ دویربێخن و چەندین لایەنێن دی ژبۆ هەلبژارتنا ئەندامان داكو ئازادیا تاكی بهێتە پاراستن و دەنگێ وی نەبیتە قوڕبانیێ هیچ لایەنەكی.
