یه‌كه‌یێن ئاكنجیبوونێ بۆ مامۆستایێن ئایینی دێ هێنه ئاڤاكرن
هه‌ولێر، قائید میرۆ:
بڕیاره ل هه‌موو پارێزگه‌هێن هه‌رێما كوردستانێ یه‌كه‌یێن ئاكنجیبوونێ بۆ مامۆستایێن ئایینی بهێنه ئاڤاكرن و په‌یڤدارێ وه‌زاره‌تا ئه‌وقافێ ژی ئاشكرا كر، ب بهایه‌كێ گونجای دێ ئه‌و یه‌كه ل سه‌ر مامۆستایێن ئایینی هێنه به‌لاڤكرن و ره‌وشا ئابووری یا مامۆستایێن ئاینی ل به‌رچاڤ هاتیه وه‌رگرتن.
نه‌به‌ز ئیسماعیل، په‌یڤدارێ وه‌زاره‌تا ئه‌وقافێ بۆ رۆژناما ئه‌ڤرۆ دیار كر، بڕیار بۆ ئاڤاكرنا یه‌كه‌یێن ئاكنجیبوونێ بۆ مامۆستایێن ئایینی هاتیه‌دان و گۆت: “بۆ ڤێ مه‌ره‌مێ لیژنه‌یه‌ك ژلایێ وه‌زاره‌تا ئه‌وقاف و كاروبارێن ئاینی هاتیه پێكئینان، مامۆستایێن ئاینی ل هه‌موو پارێزگه‌هێن هه‌رێما كوردستانێ دێ ژ وان یه‌كه‌یێن ئاكنجیبوونێ مفادار بن، دیسا دگه‌ل ده‌سته‌یا گشتیا وه‌به‌رهێنانێ هه‌ماهه‌نگی بۆ ئاڤاكرنا یه‌كه‌یێن ئاكنجیبوونێ هاتیه‌كرن”.
نه‌به‌ز ئیسماعیل ئاماژه ب وێ یه‌كێ ژی كر كو به‌لاڤكرنا یه‌كه‌یێن ئاكنجیبوونێ دێ هه‌موو مامۆستایێن ئاینی و فه‌رمانبه‌رێن وه‌زاره‌تا ئه‌وقافێ ڤه‌گریت، به‌لێ دێ خال هێنه دیاركرن و كێ پتر خال هه‌بن د قۆناغا ئێكێ دا ئه‌و دێ ژێ مفادار بن و گۆت: “بڕیاره ده‌ستپێكێ ئه‌رد بۆ پڕۆژه‌ی بهێته دیاركرن و د دووڤ دا دێ پڕۆژه كه‌ڤیته د بیاڤێ بجهئینانێ دا، شێوازێ وه‌رگرتنا پاره‌ی دێ هێته دیاركرن و ره‌وشا ئابووری یا مامۆستایێن ئاینی ل به‌رچاڤ هاتیه وه‌رگرتن”.
