یونان: ئەمریکا دێ ب مەرج فرۆکێن شەڕی دەتە تورکیا
وەزارەتا دەرڤە یا یونانێ دوهی سەبارەت ب فرۆشتنا فرۆکێن شەڕی ژ ئالیێ ئەمریکا ڤە بۆ تورکیا دیار کر، ئەمریکا ئەو ئاگەهدار کرینە کو بابەتێ فرۆشتنا فرۆکێن شەڕی بۆ تورکیا دێ یا مەرجدار بیت، بەرپرسێن ئەمریکا ب رەنگەکێ ئاشکرا بۆ تورکیا دیار کرینە نابیت فرۆکێن شەڕی دەربازی ئەسمانێ یونانێ ببن، هەکە رۆژەکێ تورکیا بڤێت وان فرۆکان ل دژی یونانێ بکار بینیت دێ ئەو فرۆکە ژ کار هێنە ئێخستن.
وەزارەتا دەرڤە یا یونانێ ئەو یەک ژی دیار کریە، وەکو یونان وان داخوازا فرۆکێن مودێرن و پێشکەفتی ژ ئەمریکا کرینە و ئەمریکا ژی بریار یا دای کو فرۆکێن شەڕی یێن مودێرن بدەتە وان، چونکی د رەوشا نها یا ئالۆز ل دەڤەرێ دا ئەمریکا ژی دڤێت پتر ژ جاران پشتەڤانیێ ل وەلاتێ یونانێ بکەت، ژ بەر ڤێ یەکێ ژی دێ ئەمریکا چەک و فرۆکێن مودێرن دەتە یونانێ.
