یونسێڤ دێ به‌رده‌وامیی َده‌ته به‌رنامێن خوه ل پارێزگه‌ها دهۆكێ
ئه‌ڤرۆ:
پارێزگارێ دهۆكێ پێشوازیا رێڤه‌به‌را نڤیسینگه‌ها رێكخراوا یونسێڤ ل ئیراقێ و شاندێ د گه‌ل دا كر و د هه‌ڤدیتنه‌كێ دا باسێ ئه‌و خزمه‌تا بۆ خوه‌جهێن پارێزگه‌هێ و ئاواره و په‌نابه‌ران د ناڤ كه‌مپان دا پێشكێش دكه‌ن و هه‌ڤكاری و هاریكاری د ناڤبه‌را هه‌ردولایان دا ب گشتی هاته كرن.
د. عه‌لی ته‌ته‌ر، پارێزگارێ دهۆكێ دوهی 20/12/2021 پێشوازی ل خانم شیما سین گوپتا، رێڤه‌به‌را نڤیسینگه‌ها رێكخراوا یونسێڤ ل ئیراقێ و شاندێ د گه‌ل دا كر و د هه‌ڤدیتنه‌كێ دا ب به‌رهه‌ڤبوونا مه‌نال محه‌مه‌د فوئاد، رێڤه‌به‌را كۆچ و كۆچبه‌ران و به‌رسڤدانا قه‌یرانان باسێ به‌رنامێن رێكخراوا یونسێڤ ل سنوورێ پارێزگه‌ها دهۆكێ و ئه‌و خزمه‌تا بۆ خوه‌جهێن پارێزگه‌هێ و ئاواره و په‌نابه‌ران پێشكێش دكه‌ن هاته كرن.
پارێزگارێ دهۆكێ سوپاسیا رێكخراوا یونسێڤ كر ل دۆر ئه‌و هاریكاریێن بۆ خوه‌جهێن پارێزگه‌هێ و ئاواره و په‌نابه‌ران پێشكێش دكه‌ن و خواست كو رێكخراوا یونسێڤ به‌رده‌وامیێ بده‌ته گه‌هاندنا هاریكاریێن خوه یێن مرۆڤایه‌تی بۆ لایه‌نێن ناڤبری و پشته‌ڤانیا كارگێریا پارێزگه‌هێ بۆ هه‌ر هاریكاریه‌كێ دیار كر.
پارێزگارێ دهۆكێ د په‌یڤه‌كێ دا گوت: “ل دووڤ راسپاردێن حكومه‌تا هه‌رێما كوردستانێ، نابیت ئاواره و په‌نابه‌ر ب خورتی بۆ سه‌ر جهێن وان بهێنه ڤه‌گه‌ڕاندن، به‌لكو دڤێت زه‌مینه بهێته خوشكرن و ئارامی و خزمه‌تگوزاریێن فه‌ر بۆ بهێنه دابینكرن و ب ئاره‌زویا خوه ڤه‌گه‌ڕنه سه‌ر جه و وارێن خوه”.
رێڤه‌به‌را نڤیسینگه‌ها رێكخراوا یونسێڤ ل ئیراقێ دیار كر كو ئه‌و دگه‌ل بۆچوونێن حكومه‌تا هه‌رێما كوردستانێ نه و نابیت ئاواره و په‌نابه‌ران ب زۆری بهێنه ڤه‌گه‌ڕاندن و گۆت: “رێكخراوا یونسێڤ دێ به‌رده‌وامیێ ده‌ته به‌رنامێن خوه ل پارێزگه‌ها دهۆكێ و دێ داخوازێ ژ وه‌لاتێن بێشكه‌ر كه‌ین، كو پتر هاریكاریا پێشكێش بكه‌ن، داكو باشتر خزمه‌تا ئاواره و په‌نابه‌ران بهێته كرن هه‌تا ئاریشا وان ب ره‌نگه‌كێ بنه‌ره‌تی دهێته چاره‌سه‌ركرن”.
