یێن شیانێن ژنان ل ده‌زگه‌هێن میدیایى دمرینن دڤێت ل خوه بزڤرن!
كاركرن د واری راگه‌هاندنێ دا وه‌ك پتریا كارین دیتر ل ده‌مه‌كی دا ئه‌و خالا سۆر بوو ئه‌وا كو نه‌دبوو ژن نێزیك ببیتێ و ب تنێ كارێ زه‌لامان بوو و ئه‌و ژنا خوه نێزیك ژی دكر تووشی سه‌دان گه‌ف و گوتگوتك و فشاران دبوو چ ژ لایێ خێزانێ ڤه چ ژی ژ لایێ جڤاكی ڤه و ئه‌ڤ چه‌نده ل وێرێ ب تنێ رانه‌دوه‌ستیا به‌لكو خوه ئه‌و ده‌زگه‌هین وێ كار ژی لێ دكر ره‌نگه ب وی چاڤێ كو پێدڤیبوو لێ بهێته نێرین لێ نه دهاته نێڕین.
ژن ئه‌و زینده‌وه‌رێ عینادی و د رژد ل سه‌ر بده‌ستڤه‌ئینانا مافێن خوه و پێشچاڤكرنا شیانێن خوه، ژنا راگه‌هاندن كار ژی ئه‌وا كو پشكه‌ك ژ وێ ژنێ ب درێژاها ڤان سالان دا یا رژد بو د به‌رچاڤكرنا خوه وه‌ك كه‌سایه‌تی و شیان و دانانا شوون تبلێن خوه د راگه‌هاندنا كوردی دا شیا سه‌رهلدانه‌كێ هه‌لسه‌نگینیت و وه‌كو ئه‌م دبینین نوكه رێژه‌یه‌كا زۆر ژ ژنێن كورد یێن د وارێ راگه‌هاندنێ دا كاردكه‌ن ئه‌ڤ شۆره‌شه وه‌كو هه‌موو شۆره‌شێن ژنان ب زه‌ندگ و باسكێن زه‌لامان نه‌هاتیه كرن به‌لكو ب شیانێن ڤان ژنان هاتیه كرن. له‌ورا ژی هێشتا زه‌لام ته‌قه‌بولا ڤی كه‌تورای ناكه‌ن و هێشتا هێشتا ل سه‌ر خوه قه‌بوول ناكه‌ن ژن وان برێڤه ببه‌ن و هه‌موو هه‌ول دهێنه دان كو هه‌رده‌م زه‌لام رێڤه‌به‌رێن ڤان ده‌زگه‌هان بن و خوه د ل ده‌مێ دانانا ده‌زگه‌هه‌كی یان گوهۆرینا رێڤه‌به‌ره‌كی ناڤێ ژنان د ناڤ چ سحبه‌ت و به‌ربژێران دا نینه. بۆچی ئه‌رێ ژنێ باوه‌ری بۆ خه‌لكی و بۆ ده‌زگه‌هێن خوه دروست نه‌كریه كو ب رێڤه‌برنا ده‌زگه‌هی رابیت یان ئه‌ڤه ژی دژایه‌تیه‌كه زه‌لام ل دژی ژنێ هه‌لدگریت یان ژی ژن خوه ب خوه نه‌یا به‌رهه‌ڤه و ل دووڤ مافێن خوه ناگه‌ریت.
ل پتریا ده‌زگه‌هێن مه یێن راگه‌هاندنێ خوه ژن وه‌ك به‌رپرسێن پشكان ژی ناهینه دانان. ئه‌ڤه یا ب مه‌ره‌م بیت یان یا بێ مه‌ره‌م بیت دڤێت پێداچوونه‌ك و سه‌ر راوه‌ستیانه‌ك بۆ بهێته كرن، چونكی هه‌تا كو ئه‌م ب خوه د ئازاد نه‌بین ئه‌م نه‌شیێن جڤاكه‌كی ئازاد بكه‌ین، تاكو ئه‌م مافێن خوه ب ده‌ستڤه نه‌ئینین ئه‌م نه‌شێین داخوازیا مافێن خه‌لكی بكه‌ین. ل ده‌زگه‌هێن مه ب ده‌هان خانمێن رۆژنامه‌ڤان هه‌نه شایه‌نی به‌رپرسیاره‌تێ نه، هه‌كه باوه‌ری ب وان بهێته دان دێ ل جهێ وێ باوه‌ریێ بن، یا فه‌ره ژن رێڤه‌به‌ریا هنده‌ك ژ ڤان ده‌زگه‌هان بكه‌ن چونكی شوون تبلێن ژنێ تایبه‌تمه‌ندیه‌كا جودا یاهه‌ی زه‌وق و تامه‌كا تایبه‌ت دێ ب ده‌زگه‌هی ڤه دیار كه‌ت و ژبه‌ركو ناما راگه‌هاندنێ ئاراسته‌كی جڤاكی هه‌موویێ دبیت دێ رێژه‌یه‌كا باش ژ خه‌لكی ب وێ تاما تایبه‌ت ڤه گرێده‌ت ب تایبه‌ت جه‌ماوه‌رێ ژن چونكی ب تنێ ژن زه‌وق و حه‌ز و ئاراستێن ژنێ دزانیت و تێدگه‌هیت.
