یێ شله‌مه‌نیان ل به‌ر هه‌تاڤێ بدانیت یان ب ڤه‌گوهێزیت دێ هێته سزادان
نیوار محه‌مه‌دسه‌لیم:
قایمقامێ قه‌زا دهۆكێ راگه‌هاند، ژ به‌ر بلندبوونا پلێن گه‌رمێ، نابیت چو لایه‌نه‌ك شله‌مه‌نیان ل به‌ر ده‌رێ دكانا خوه بدانیت یان ژی ل به‌ر هه‌تاڤێ ڤه‌گوهێزیت، ژ به‌ر كو ژ لایێ فیزیاوی ڤه كارتێكرن لێ دبیت.
جه‌هوه‌ر عه‌لی، قایمقامێ قه‌زا دهۆكێ بۆ رۆژناما ئه‌ڤرۆ گۆت: “كه‌لوپه‌لێن خوارن و ڤه‌خوارنێ نابیت چو ل به‌ر ده‌رگه‌هێن ماركێتان بیت یان هه‌ر جهه‌كێ هه‌بیت ل به‌ر هه‌تاڤێ بهێنه دانان، دیسا ل ده‌مێ ڤه‌گوهاستنێ ژی”.
زێده‌تر گۆت: “ل ده‌مێ ڤه‌گوهاستنێ ژی دڤێت ئه‌ڤ كه‌لوپه‌له بهێنه خیڤه‌تكرن، دا پلێن گه‌رمێ كارتێكرنێ لێ نه‌كه‌ن، ب تایبه‌ت ژی ئه‌ڤ ساله پێلێن گه‌رمێ گه‌له‌ك د بلندن و دێ كارتێكرنا وێ ژی ل سه‌ر ڤان به‌رهه‌مان زێده‌تر بیت، له‌و لژنێن مه و چاڤدێریا ساخله‌میێ ژی یێن هاتینه راسپاردن كو نه‌هێلن ئه‌ڤ كه‌لوپه‌له ل به‌ر هه‌تاڤێ بهێنه دانان و ڤه‌گوهاستن، دیسا پۆلیسێن هاتنوچوونێ ژی هاتینه راسپاردن كو هه‌ر ترۆمبێله‌كا بارهه‌لگرا شله‌مه‌نیان ڤه‌دگوهێزیت و یا خیڤه‌تكری نه‌بیت، رێنما ل گه‌ل بهێنه وه‌رگرتن و بهێنه سزادان”.
قایمقامێ قه‌زا دهۆكێ ئاشكرا ژی كر كو هه‌كه خوه ئێكسپایه‌را وان ژی یا دروست بیت ژ لایێ فیزیایی ڤه ئه‌ڤ كه‌لوپه‌له تێك دچن، ب كێری ڤه‌خوانێ ناهێن و گۆت: “گه‌له‌ك جاران كه‌ره‌سته‌ك ژ ڤان كه‌رستێن شل دێ بكارئینی، دێ ژ تامێ زانی ژ به‌ر گه‌رمێ كارتێكرن یا ل ڤی كه‌ره‌سته‌ی بووی”.
جه‌هوه‌ر عه‌لی گۆت: “چه‌ندین كه‌س ل سه‌ر ڤی بابه‌تی هاتینه ده‌سته‌سه‌ركرن و دێ د به‌رده‌وام بین، هیڤی دكه‌ین خه‌لكێ مه ژی یێ پێگیر بیت بۆ وێ چه‌ندێ ئه‌ڤ كه‌لوپه‌لێن ل بازاری هه‌ین د ساخله‌م بن، دانان و هه‌لگرتن و عه‌مباركرنا وان ژی یا ساخله‌م بیت”.
