یێ جودا بە
ئـادار هـوگـر
پتریا دەمێن ژیانا خۆ ئەم مرۆڤ ل ژێر كاریگەریا كەسانێن دەورۆبەرێن خۆ دژین و چاڤ ل وان دكەین و بزاڤێ ناكەین هزرا خۆ د كریاران دا بكەین كا د دروستن یان ژی د خەلەتن و كا دێ مفای بۆ مە و جڤاكا مە هەبیت یان نە، هەما ئەم وەكی وان دكەین داكو بەس د جودا نەبین ژ وان و ئەم نەبینە ئەو كەسێن جودا یێن كو دێ هەمی كەس ب چاڤێ مەندەهۆشی بەرێ خۆ دەنێ.
یا ئاشكەرایە كو گەلەك نە ئارامییا د هندێ دا هەی كو جودا رەفتارێ بكەی و گرنگیێ ب كریارێن دەورۆبەران نەدەین و رێكەكا تایبەت بۆ خۆ بهەلبژێرین بۆ رەفتاركرنێ، بەلێ پا ئاها ئەو جوداهی دەستپێكە و گوهۆرینە و باشتركرنە بۆ ئەو كەسێن د دویڤ مە دا دهێن. گەلەك جاران یا هەی ئەم دەربارەی بابەتەكێ دیاركری بێژین“ ما ژ من خەلەتە هەمی كەس وەدكەن”، ب راستی ژی بەلێ ژ مە خەلەتە ئەگەر ئەم وەنەكەین و رەفتارا درست بهەلبژێرین ل جهێ ئەوێ رەفتارا هەمی كەس دكەن، یا ئێكێ ئەم دێ بینە رێنیشادەر بۆ ئاراستەكێ جودا و یا دووێ دێ د ناخێ خۆ دا شانازیێ ب خۆ بەین ژ بۆ ئەو رێكا راست یاكو مە هەلبژارتی. یا گرنگە نموونەیەكا سادە بینین داكو بابەت پتر رۆهن بیت، گەلەك جاران یا هەی ل سەر جادێ یان ل پاركەكێ هندەك بەرمایك د دەستێ مە دابن ژ ئەوێ تشتێ مە خواری، ئەگەر ئەم رابین و ئەوی بەرمایكی بهاڤێژینە ئەردی ب بهانەیا هندێ كو ئەو بخۆ بەرمایك یێن ل ئەردی هەین و یێ من چ گوهۆڕینا مەزن پەیداناكەت هەما دێ چاڤ ل خەلكی كەم، ئاها ل وی دەمی ئەم د سەلمینین ئەم نەبووینە خۆدانێن بڕیارێن ژیانا خۆ و ئەم دهێلین دەورۆبەر كونترولا رەفتار و هزرێن مە بكەن، لێ بەرۆڤاژی ئەگەر مە بڕیاردا ئەوی بەرمایكی بكەینە د سلكەكا بەرمایكان دا، ژبلی كو دێ ژینگەهـێ بپارێزین دبیت ل وێ خۆلەكا ئەم ئەڤی كاری دكەین هندەك زاڕۆك مە ببینن و چاڤ ل مە بكەن و ئەڤ دیمەنە د مەژیێ وان دا هەردەم دوبارە ببیت دەمێ كو هەول ددەن بەرمایكی بهاڤژنە ئەردی. مەرج نینە ئەو كریارێن هەردەم دهێنەكرن ژ لایێ هەمی كەسان ڤە كریارێ دروست بن، بلا ئەم ببینە كەسانێن شارەزا رەفتارێن مرۆڤان یێن دروست بۆ خۆ مفای ژێ وەرگرین و رەفتارێن نە دروست هزر تێدا بكەین و دوێرەك بین وان بگۆهورین بۆ باشیێ داكو پێنگاڤ پێنگاڤ ئەم ببینە جڤاكەكێ پێشكەفتی نە بتنێ ب ئاخفتنێ بەلكو ب كریار و سەلماندن ڤە.
