یێ نهچیته ریفراندۆمێ نهخائین و نه خوهفرۆش و نه ..!
راپرسی پرۆسهكا دیمۆكراسى یه و ب رێیا دهنگدانێ بۆ هندهك پرسێن گرنگ و ئالۆز دهێتهكرن، وهكو هندهك پرسێن سیاسی و نهتهوهیی و ئاریشێن سنووری و یا ژ ههمیان گرنگتر راپرسیا جودابوونا نهتهوهیی یه، كو چارهكرنا وان یا ئالۆز و ب ئاستهنگه، لهورا راپرسی دبیته رێیهكا ئێكلاكهر بۆ چارهكرنا وان پرسان، ئهڤجا چونكی پرۆسهیهكا دیمۆكراسى یه، راپرسی د ناڤ مللهتى دا ب بهلێ و ب نهخێر دهێته ئهنجامدان و چ گهنگهشا دى ل سهر ناهێتهكرن.
وهكو یا دیار سهرۆكێ ههرێما كوردستانێ ل 7/6/2017 دگهل پرانیا ئالیێن سیاسیێن ههرێما كوردستانێ رۆژا 25/9/2017 بۆ ئهنجامدانا ریفراندۆما جودابوونێ ژ عیراقێ دهستنیشان كریه، ژ ئالیهكى ڤه د ناڤ جهماوهری دا پێشوازیهكا باش لێهاتهكرن و ژ هندهك ئالیێن سیاسی ڤه گهنگهشهكا دژوار ل سهر هاتهكرن، ههتا وى رادهى گههشته تۆرێن جڤاكی و ههمى تهخ و چوینێن ههرێما كوردستانێ و ههر ئێكی وهكى خوه شرۆڤه بۆ كر و گهنگهشه ل سهر كریه و بوویه بابهتێن سازیێن راگههاندنێ، لهورا بوویه سهدهما دروستبوونا ناكۆكی و دوبهرهكیێ د ناڤبهرا جهماوهری دا و ژ ئالیهكێ دى ڤه د ناڤبهرا ئالیێن سیاسی دا ئهو ناكۆكی و كهربوكین كوورتر لێهاتن!، چونكی هاتیه گۆتن كو نابیت كهس خوه بێ بههر بكهت ژ ریفراندۆمێ و یێ نهچیت خوهفرۆش و خائینه، ههروهسا هاتیه گۆتن كو یێ نهچیت كورێ …. یه و چهندین ئاخفتنێن كرێت هاتینه گۆتن.
ب دیتنا من ئهو ئاخفتن ههمى دشاشن و نه د بهرژهوهندیا ریفراندۆمێ و نهتهوهیێ كورد دانه، چونكی پرۆسهیهكا دیمۆكراسى یه و خهلكێ ئازاده ب بهلێ یان ب نهخێر دهنگێ خوه بدهت، یا دی خهلك وان ئاخفتنێن كرێت ل سهر خوه قهبوول ناكهت، ئهڤه ب ڤى ئاوایی تاكێ حهزا بهلێ ژی دهنگێ خوه بدهت، دلێ وى شكهست! ههروهسا ئهو كهنالێن پرسا ریفراندۆمێ ژی كرینه بابهتێن گهرمێن بهرنامێن خوه ئهو ژی دشاشن، چونكی ئهو ژی بووینه سهدهما كوورترلێكرنا كهربوكینێ د ناڤبهرا ئالیێن سیاسی دا.
مه دیت بهری دو سالان ئوسكتلهندا بریار دا كو راپرسیێ ل دۆر جودابوونێ ژ بریتانیا بكهت و ل رۆژا 18/9/2014 هاته كرن و تێدا خهلكی 55.42% دهنگ ب نهخێر دا ههمبهری 44.58% ب بهلێ و ئهنجام هاتنه راگههاندن قهبوولكرن! باشه ههكه وهسا بیت پرانیا خهلكێ ئوسكتلهندا خائین و خوهفرۆش و نهحهلالن! ئهرێ ما ئهڤه تشتهكێ بهرئاقله؟ ئهرێ تو بێژی ئهوى خهلكى ئازادبوون و سهرخوهبوون نهڤێت؟ ب دیتنا من نهخێر تهڤایا خهلكێ وى وهلاتى سهرخوهبوون دڤێت!، لێ وان ب ژیرانه و دوور ژ عاتیفێ گۆتییه نهخێر و وان باشتر دیتیه ڤى سهردهمی هێشتا بمینن دگهل حوكمهتا مهركهزى، لهورا دبێژم یێ نهچیته ریفراندۆمێ نهخائین و خوهفرۆش و كورێ … یه!.
ب دیتنا ل شوونا وان پهیڤێن نهشرین ههكه ئهم خهلكێ خوه تێ بگههینین راپرسی و ریفراندۆم چی یه و خرابی و باشیێن وێ چنه و ههروهسا پێناسهیا ریفراندۆمێ بۆ خهلكی رۆهن بكهین باشتره، ههروهسا پێدڤیه بۆ خهلكى و گهلێن كوردستانێ دیار بكهین كو ریفراندۆم نه ب ناڤێ هیچ پارتهكا سیاسی یه، بهلكو ب ناڤێ ههموو كوردستانیانه و پرسهكا نهتهوهیی یه و هیچ پهیوهندی ب پارتان ڤه نینه، چونكی ههكه بۆ پارتهكا سیاسی بیت ئهڤه ب تنێ ئهندام و ئالیگرێن وێ پارتێ ب تنێ دێ چنه دهنگدانێ یان ئهو ب تنێ دێ دهنگی ب بهلێ دهن، لێ بهرۆڤاژی ههمى كوردستانی یێن مافێ دهنگدانێ ههبیت دێ چنه دهنگدانێ و ب بهلێ دهنگێ خوه دهن.
ب ڤى ئاوایی مللهت دا پتر بهر ب دهنگدانێ ڤه چیت، چونكی باوهر ناكهم مللهتهكێ زۆلم و زۆری و ستهم دیتی بێژیت نهخێر بۆ جودابوونێ! لێ وان رهفتاران كارتێكرنهكا ههری خراب د ناڤ وهلاتیان دا كریه، ههروهسا ئهو كهنالێن پرسا ریفراندۆمێ كریه بابهتێن گهرمێن بهرنامێن خوه، ههكه شارهزا و بسپۆرێن د ڤى واری دا مێڤان كربان و ب ئاوایهكێ زانستى ئهڤ پرسه شرۆڤه كربایه، رهنگه ئهو ناكۆكیێن ل سهر ئهنجامدانا ریفراندۆمێ د ناڤبهرا ئالیێن سیاسی دا ههین نهمابانه و ههمى كوردستانى ب دلهكێ خۆش بهر ب سندۆقێن دهنگدانێ ڤه چووبان.
