یەكەیەكا تایبەت بۆ تاپۆكرنا ئەردێن كارت هاتیە پێكئینان

هەولێر، قائید میرۆ:

رێڤەبەرێ گشتیێ خانووبەرەیێن میری دیاركر، یەكەیەكا تایبەت بۆ تاپۆكرنا ئەردێن كارت هاتیە پێكئینان و دبێژیت: هەتا نوكە زێدەتری 80 هزار پارچە ئەردێن كارت هاتینە گوهۆڕین بۆ تاپۆیێ و پرۆسە ژی یا بەردەوامە.
حاكم لوقمان عومەر، رێڤەبەرێ گشتیێ تۆماركرنا خانووبەرەیێن میری بۆ رۆژناما ئەڤرۆ گۆت: «ل سەرانسەری هەرێما كوردستانێ زێدەتری 80 هزار پارچە ئەردێن كارت هاتینە تاپۆكرن و پرۆسا تاپۆكرنا ئەردێن كارت یا بەردەوامە، ب رێیا یەكەیەكا تایبەت كار بۆ تاپۆكرنا هەموو ئەردێن كارت دهێتە كرن، ل سنۆرێ پارێزگەها دهۆكێ ئەردێن كارت دشێم بێژم نەماینە و ل هەولێر و سلێمانیێ ژی زۆر كێم بووینە، ئەڤێن مای ژی نوكە كار ل سەر دهێتەكرن ببنە تاپۆ».
حاكم لوقمان گۆتژی: «ئەردێن كارت ئاریشەیێن زۆر تێدا بوون و پێدڤی یە نەهێنە بەلاڤكرن هەتا نەبنە سەنەد، بەلێ ژ بەر كاودانێن سالێن بۆری، بەری پارچەیێن ئەردی بهێنە تاپۆكرن؛ هاتینە بەلاڤكرن، چارەسەركرنا وان و گوهۆڕینا كارتان بۆ تاپۆیێ دێ مفایەكێ زۆر بۆ وەلاتیان هەبیت، ئەڤێن ئاریشە ژی تێدا هەی دێ چارەسەر بن، چونكی حوكمەتا هەرێما كوردستانێ یا رژدە، كو ئەردێن كارت نەمینن».

کۆمێنتا تە