یەمەن د بیاڤێ پراکتیکی دا بوویە دو دەولەت
ئەڤرۆ:
ل گۆر راپۆرتەکا ئاژانسا فرانس پرێس پشتی کو حوسیێن شیعە باژارێ سەنعا پایتەختێ یەمەنێ داگیر کری سەرۆک کۆمارێ وی وەلاتی مەنسور ھادی باژارێ عەدن وەک پایتەختێ بەروەخت یێ یەمەنێ راگەھاند و داخواز ژ ھەموو وەلاتێن جیھانێ ژی کر کو پشتەڤانیێ ل وی بکەن. چونکو ئەو سەرۆک کۆمارێ قانوونی یێ یەمەنێ یە و حوسیان ب کۆدەتایێ پایتەخت داگیر کرینە و دڤێت حوسی ژ سەنعا بھێنە دەرخستن و گۆت: (پرانیا وەلاتێن عەرەبی پشتەڤانیێ ل مە دکەن و دڤێت وەلاتێن دی یێن جیھانێ ژی پشتەڤانیا مە بکەن دا ئەم بشێن یەمەنێ ژ ھەموو ئالۆزیێن ناڤخوەیی دوور بکەین و بەردەوامیێ بدەینە پرۆسا ئاڤەدانی و دیموکراسیێ).
د بەردەوامیا راپۆرتێ دا ھاتیە دیار کرن کو پشتی سەرۆک کۆمار عەدن وەک پایتەختێ بەروەخت یێ یەمەنێ راگەھاندی پرانیا وەزیر و بەرپرسێن کابیا وی بەرێ خوە ددەنە باژارێ عەدن و دوھی ژی وەزیرێ بەرەڤانیێ یێ یەمەنێ مەحمود سەبیحی ل گەل چەندین ئەفسەر پایەبلند گەھشتنە باژارێ عەدن و پشتەڤانیا خوە بۆ سەرۆک کۆماری راگەھاندن و دیار کرن ئەو دێ شەری بۆ ئاڤاکرنا یەمەنێ بکەن و ناھێلن کو گرۆپەکا ھشکباوەر وەک حوسیان ب زۆرێ دەستھەلاتا خوە ل سەر خەلکێ یەمەنێ فەرز بکەن.
چاڤدێرێن سیاسی ژی دیار دکەن کو سعوودیە و گەلەک وەلاتێن دی یێن کەنداڤی ل دژی دەستێوەردانێن ئیرانێ ل یەمەنێ پشتەڤانیا مەنسور ھادی سەرۆک کۆمارێ یەمەنێ دکەن و ژ بەر ڤێ یەکێ ژی نھا د بیاڤێ پراکتیکی دا ل یەمەنێ دو دەولەت دروست بووینە و دو پایتەخت ژی ھەنە و ئەڤە ژی نیشا ددەت کو ئالۆزی و شەرێ ل یەمەنێ دێ بۆ ماوەیەکێ درێژ ڤەکێشیت.
