10 ریكۆرد ب زەحمەتن د چامپیۆنزێ دا بهێنە شكاندن
پشتی ب دووماهی هاتنا چامپیۆنزا وەرزێ 2023-2024ێ یانەیا ریال مەدرید یا ئسپانی شیایی ناسناڤی ب دەستڤە بینت ب سەركەڤتی ل سەر یانەیا بۆرۆسیا دۆرتمۆند یا ئەلمانی ب دو گۆلان بێ بەرانبەر و شیا هژمارەیا ناسناڤێن خوە بگەهینە 15 چامپیۆنز، د ناڤ د یرۆكا ڤێ قارەمانیێ دا چەندین ریكۆرد هەنە ل سەر ئاستێ یانە و یاریزانان هاتینە تۆماركرن، هندەك ژوان هاتبوونە شكاندن لێ هندەك هەنە هەتا دووماهی چامپیۆنز ئەوا ل شەمبییا بۆری هاتیە كرن نە هاتینە شكاندن، گرنگترین ئەو ریكۆردێن هەتا نوكە نە هاتینە شكاندن بڤی شێوەیی نە.
ب لەزترین گۆل
گۆلا ستێرێ یانەیا بایرن میۆنخ یا ئەلمانی رۆی ماكایی دهێتە هژمارتن ب لەزترین گۆل د دیرۆكا یاریێن قارەمانییا چامپیۆنز لیگ دا، ئەوا ل سەر یانەیا ریال مەدرید یا ئسپانی ئینایی ل ئادارا 2007ێ ژ چارچووڤەیێ قۆناغا 15ێ كو پشتی بورینا 10 چركا ژ دەستپێكا یاریێ گۆل تۆماركرن.
پترترین گۆل د یارییەكێ دا
دهێتە هژمارتن یارییا بۆرۆسیا دۆرتمۆند یا ئەلمانی و مێڤانا وێ لیچییا وارسۆ یا نەرویجی پترترین گۆل هاتینە تۆماركرن ئەوا ژ سیستەمێ كۆما یا گەڕا پێنجێ ل سالا 2016ێ دا دەمی یاری ب سەركەفتنا یانەیا ئەلمانی ب 8-4 گۆلان ب دووماهی هاتی.
بەرهەڤبوونا پشتەڤانان د رێژەكا پیڤایی دا
ل وەرزێ 1994- 1995ێ یاری دناڤبەرا یانەیا بەرشەلۆنا یا ئسپانی و پاریس سانجێرمان یا فرەنسی هاتبوو ئەنجامدان و مەزنترین رێژەیا پشتەڤانێن هەردو یانەیان بەرهەڤبوون كو دگەهشتە 115 هزار كەسان ل یاریگەها كامپ نۆ و هەتا نوكە ئەڤ رێژە نە هاتیە شكاندن.
مەزنترین یاریزان
گۆلپارێزێ ئیتالی و یانەیا لاتسیۆ ماركۆ بالۆتا وەكو مەزنترین یاریزان دناڤ چامپیۆنز لیگ دا د یارییا تیما وان بەرانبەر یانەیا ریال مەدرید یا ئیسپانی ل 2007ێ هاتییە ناساندن كو ژیێ وی 43 سالە و 252 رۆژ بوون، دووڤدا گۆلپارێزێ ئیتالی لویجی بۆفۆن یێ 42 سال و 315 رۆژ بوون.
بچووكترین یاریزان
بەری سێ حەفتییان ژ ئاهنگێرانا خوە یا 16 سالی یاریزانێ یانەیا بۆرۆسیا دۆرتمۆند یۆسۆڤا مۆكۆكۆ چوو د پەرتۆكا ریكۆردێن ب زەحمەت یێن چامپیۆنزێ دا، دەمێ د یارییا تیما وی بەرانبەر یانەیا زێنیت سان پوترۆسبۆرگ یا رۆسیایی یاری كر ئەوا ل چامپیۆنزا 2020ێ هاتییە كرن.
درێژترین زنجیرەیا گۆلان
ستێرێ پۆرتۆگالی كریستیانۆ رۆنالدۆ ناسناڤێ درێژترین زنجێرەیا گۆلان د چامپیۆنزێ دا وەرگرتییە ئەوێ د ماوەیێ 11 یارییان دا بەردەوام گۆل هەبوون و دەستپێكا یاریێن 2017ێ بوو.
پترترین هژمارەیا گۆلان د ئێك وەرز دا
هەردیسان ستێرێ پۆرتۆگالی كریستیانۆ رۆنالد خودانێ پترترین گۆلە د ئێك وەرز دا دگەل یانەیا خوە یا بەرێ ریال مەدرید ئەوێ 17 گۆل د چامپیۆنزا 2013-2014ێ ئینایی، ئەوێ نەهـ گۆل د قۆناغا كۆمان دا ئینایی، چار گۆل د قۆناغا 16ێ دا، گۆلەك ل چارێك دووماهیێ و دو گۆل پێش دووماهیێ و گۆلەك د یارییا دووماهیێ دا.
پترترین گۆل د چەند وەرزێن ل دووڤ ئێك دا
ستێرێ ئەرجەنتینی لیۆنێل مێسی شیابوو 18 وەرزاندا گۆلا ل سەرهەڤڕكێن خوە د هەڤڕكیێن چامپیۆنز لیگ دا بینت و ئەڤ ڕیكۆردە ب زەحمەت بهێتە شكاندن.
پترترین گۆل بۆ ئێك تیم
هەروەسان لۆنێل مێسی شیایە 120 گۆلان بۆ تیما خوە بەرشەلۆنا د 149 یاریان دا بینت كو دهێتە هژمارتن مەزنترین رێژەیا گۆلان یاریزانەك بۆ ئێك تیم د چامپیۆنزێ دا بینت د دەمەكی دا كریستیانۆ رۆنالدۆیی 105 گۆل بۆ ریال مەدریدێ ئینابوون.
پترترین یاریكرن بێ دەستڤەئینانا ناسناڤی
ستێرێ بەرنیاس و ئەفسانەیێ ئیتالا گۆلپارێز جیانلۆیجی بۆفۆن خودانێ 131 یاریا د چامپیۆنز لیگ دایە، سێ ناسناڤێن نێزكبوونێ ژ دەستداینە دەمێ تیما وی یۆڤانتۆس چوویە یاریا دووماهیێ و خوسارەت بووین، ل وەرزێ 2002-2003 بەرانبەر میلان، ل وەرزێ 2014- 2015 بەرانبەر بەرشەلۆنا، ل وەرزێ 2016- 2017ێ بەرانبەر ریال مەدرید.
