10 هەلبەستێن ئەحمەدێ جارەللایێ یاسینی
ئەحمەدێ جارەللایێ یاسینی
تنێ ئەو
ئەڤە سەردەمەكە
هەر تشت تێدا تەنگە:
ئەڤینی
گۆڕ
بەریك
كراس
جەنگ تێنە،
ئەو بەرفرەه بوویە.
بیرهاتن
جارەكێ
من پرسیار ژ دارەكا دسەكەراتێ دا كر:
– ژیێ تە چەندە؟
بەرسڤ دا:
ژیێ من هزار سێڤن و
ب سەدان سڤیانكن و
ب دەهان هێلینن و
بیرهاتنەكا بتنێ یە
یا دو ئەڤیندارێن ل نێزیك من
ژێكڤەبووین.
ئەوە ئەو بیرهاتنە
لسەر قورمێ من هاتیە كۆلان
بەلگێن من ژ وەشاندنێ
نە ڕاوەستیاینە و
چقێن من ژ وەریانێ و
دەمارێن من ژ تەلافتنێ.
تەنیاتی
هەلبەستڤانێ ئێكێ
ژ زارۆیێ خوە یێ ئێكانە ڕا گوت:
ژن دارە.
هەلبەستڤانێ دویێ
ژ زارۆیا خوە یا ئێكانە ڕا گوت:
زەلام ئەورە.
پشتی چەند سالان
زەلامەكێ ئێكانە و
ژنەكا ئێكانە
ئێكو دو دیتن
بارانەكا بۆش و
فێقیەكێ مشە
ب سەرواندا باری.
وەسیەت
بەرانبەری ژنا جوان نە روونە خوار
چونكی دەمێ ڕادبت و دچت
تو دێ د وێ دا روونشتی مینێ.
شەرم
دەمێ ل پاییزێ
دارا خوە تازی كری
ئەردی چاڤێن خوە
ب بەلگان نقاندن.
كوشتن
كەس نەوێرت
هەلبەستڤانەكێ بكوژیت
ژ بلی ئەڤیندارا وی و
رەخنەگرێن بونیاتگەری .
بۆ موتەنەبی
تو درەوینەكێ مەزنی
چونگی هەسپ ل ڤی سەردەمی
گەلەك رەنگێن ئالفی ناس دكن
لێ تە ناس ناكن.
ئەدەب
كەنگی دێ قونبەلە ب ئەدەب كەڤن؟
دێ دەرگەهی قوتن
بەری ڤ مە دكەڤن ؟
بارەكێ گران
دەمێ خانما من باركری
هەمی تشتێن د باژێری دا
كرن د جانتا دلێ خوە دا:
جاددە، دار، رەسیف، ئاڤاهی،
پەرتووك، چوچك، هەلبەست وباران
ئەز تێ نە
ژ ترسا نەكو بارێ وێ گران بت.
جەنگەكا گەلەك تایبەت
ئەڤینا تە جەنگەكا درێژە
ئو دلێ من
تنێ فیشەكێن رۆژەكێ
دگەل خوە ئیناینە.
سەرهاتیا وارەكێ
دایك ب واری ڤە مژوولن
هەر ژ رۆژا ئێكێ یا ژ دایكبوونا وی
ئێك شیری ددەتێ
یا دوێ لاندكا وی دهەژینت
یاسیێ جلكێن وی ڕادئێخت
یا چارێ بەرەڤ دبستانێ دەستێ وی دگرت
یا پێنجێ هوشداریێ ژ كچكێن زانكویێ ددەتێ
یاشەشێ بۆ تلیلیا ڤەددەت ل ئاهەنگا دەرچوونێ
لێ باب
ب درێژیا سالان
ب شەری ڤە مژوولن و
ب كۆلانا گۆڕێ وی
ب تڤەنگان.
ژێدەر :
الی …….. برقیات وصلت متأخرە .2009 ژ وەشانێن رێڤەبەریا گشتی یا پەروەردا نەینەوا .
ئەحمەدێ جارەللایێ یاسین:
هەلبەستڤان و چیرۆكنڤیسەكێ ئیراقییە، ل باژێرێ میسلێ ژدایكبوویە. دوكتورا د ئەدەبێ نوی دا هەیە
ژ بەرهەمێن چاپكری:
هەوامش – هەلیەست 1999
دیوانەكا هەلبەستان یا هەڤپشك لژێر ناڤێ – مونتیفێن ڤەكری – سالا 1999 .
كۆمەلەكا چیرۆكێن هەڤپشك بناڤێ چیرۆك ژ نەینەوا ، سالا 2003. كۆمەلەكا چیرۆكان بناڤێ (حەرب) سالا 2004
