100 هزار تەنێن بەرهەمێ ناڤخوەیی د سالا بۆری دا بۆ دەرڤەی وەلاتی هاتینە هنارتن
دهۆك، دلۆڤان ئاكرەیی:
سەرۆكێ گشتیێ ئێكەتیا ئینان و هنارتنكارێن هەرێما كوردستانێ دیاركر، سالا بۆری نێزیكی 100 هزار تەنێن بەرهەمێ ناڤخوەیی یێ هەرێما كوردستانێ بۆ وەلاتێن جیهانێ هاتینە هنارتن، ژ وان ژی: 12 جۆرێن دەرمانێن نۆشداری وەكو بەرهەمێ هەرێما كوردستانێ بۆ دەرڤە هاتینە هنارتن.
شێخ مستەفا عەبدولرەحمان، سەرۆكێ گشتیێ ئێكەتیا ئینان و هنارتنكارێن هەرێما كوردستانێ بۆ رۆژنامەیا ئەڤرۆ گۆت: «ئێك ژ كارێن سەرەكی یێن كابینەیا نەهێ یا حوكمەتا هەرێما كوردستانێ، گرنگیدانە ب بەرهەمێ ناڤخوەیی، د ماوەیێ ڤێ كابینەیێ دا، ئاسانكاریێن زۆر بۆ جۆتیاران و خودانكارێن ناڤخوە هاتینە كرن، ب ئاوایەكی؛ هەر كارگەهەكا بەرهەمێ وێ 25% پێدڤیێن ناڤخوەیی دابین بكەت، حوكمەت دێ راستەوخۆ ل دەرگەهان باجەكا زۆر دانیتە سەر وی جۆرێ بەرهەمی یێ ژ دەرڤە دهێت، بۆ وێ چەندێ بەرهەمێ ناڤخوەیی بهێتە پاراستن، دا كو باندۆر ل سەر بەرهەمێ ناڤخوەیی نەبیت».
گۆتژی: «د نوكە دا 150 جۆرێن بەرهەمێن ناڤخوەیی گەهشتینە وی ئاستی، كو دشێن 50% هەتا 100% پێدڤیێن بازاڕێ ناڤخوەیی یێ هەرێما كوردستانێ دابین بكەن، وەكو: بەرهەمێن سپیاتی، پەلەوەر و هێك و شیش و چیمەنتۆ، ب رێژەیا 70% بەرهەمێ كارگەهان بۆ باژێڕێن ناڤەراست و باشوورێ ئیراقێ دهێتە هنارتن».
ل دویڤ ئامارێن وێ ئێكەتیێ، د سالا 2025 دا، 99 هزار و 852 تەنێن بەرهەمێن ناڤخوەیی ژ خوارن و كەلوپەلان بۆ وەلاتان هاتینە هنارتن.
