105 پێشانگه‌هێن تایبه‌ت ڤه‌كرینه و پشكداری د 50 یێن هه‌ڤپشكدا كریه
هه‌له‌بجه، عه‌زیز هه‌ورامی:
شێوه‌كارێ به‌رنیاس (عه‌لی تازه‌دی) د دیداره‌كێ دا بۆ رۆژناما ئه‌ڤرۆ گۆت: ل سالا 1991 ل سالڤه‌گه‌ڕا كیمیا بارانا هه‌له‌بجه و ئه‌نفالان من پێشانگه‌هه‌كا تایبه‌ت ل سه‌ر ئه‌ركێ خوه ڤه‌كر، هه‌روه‌سا ل گه‌ل كۆمه‌كا شێوه‌كارێن ئیراقی ب دو كه‌ڤالان من پشكداری د پێشانگه‌هه‌كا هه‌ڤپشكدا كر، كه‌ڤاله‌ك یێ شه‌هید عومه‌ر خاوه‌ر بوو كو ب هێمایێ شه‌هیدێن هه‌له‌بجه دهێته نیاسین، كه‌ڤالێ دویێ ل دۆر ئالایێ ئیراقێ بوو.
ناڤهاتی گۆت: هه‌تا نوكه من (105) پێشانگه‌هێن تایبه‌ت ڤه‌كرینه و پشكداری د (50) پێشانگه‌هێن هه‌ڤپشكدا كریه، هه‌روه‌سا هنده‌ك كه‌ڤالێن من ل پێشانگه‌هێن ده‌رڤه‌ی وه‌لاتی هاتینه نیشادان، بۆ زانین ئه‌ز گه‌له‌ك حه‌ز ژ كه‌ڤالێن خوه دكه‌م و من نه‌ڤێت بفرۆشم، جاره‌كێ بۆ كه‌ڤاله‌كی دو ملیۆن دینار دانه من و ئه‌ز رازی نه‌بووم بفرۆشم، هه‌روه‌سا گه‌له‌ك جاران زیده‌تر ژی داینه من هه‌ر من نه فرۆتینه و ناڤه‌رۆكا پتریا كه‌ڤالێن من ل دۆر ئه‌نفال و كاره‌سات و جینۆسایدێن كوردانه.
ل دووماهیێ گۆت: گازندا مه یا به‌رێ و نوكه هه‌ر ئه‌وه كو حكومه‌ت هاریكاریا هونه‌رمه‌ندان ب تایبه‌ت ژی شێوه‌كاران ناكه‌ت و هه‌كه هه‌بیت ژی نه ل دووف ئاستێ پێدڤی بوویه و گه‌له‌كا كێمه، و ده‌مێ پێشانگه‌هه‌كا من دهێته ڤه‌كرن هه‌كه ئه‌ز ل وێرێ ژی نه‌بم چنكو ناڤه‌رۆكا كه‌ڤالێن من یا دیاره و ئه‌و ب خوه دئاخڤن و گه‌له‌ك كه‌ڤالێن ل پێشانگه‌هێن ده‌رڤه‌ی وه‌لاتی هاتینه نیشادان و ئه‌ز ل وێرێ یێ به‌رهه‌ڤ نه‌بووم، لێ نه‌بوو ئاریشه چنكو ئه‌و كه‌سێن سه‌ره‌دانا پێشانگه‌هێن دكرن ب دروستی د بابه‌تێ كه‌ڤالی دگه‌هشتن.
