11 سالە سێمێل هیڤیێن دەربازبوونێ ژ دەست ددەت
تیما فوتبۆلا یانەیا سێمێلێ بۆ سالا 11ێ ل دووڤ ئێك هیڤیێن دەربازبوونێ بەر ب پلا نایابا كوردستانێ بۆ وەرزێ بهێت پاشئێخستن، پشتی دگەل مێڤانا خوە یانەیا كۆیە ب سێ گۆلان بێ بەرانبەر تووشی خوسارەت بوویی، د یارییا واندا ئەوا ل ئەینییا بۆری ژ چارچووڤەیێ گەڕا 13ێ و بەری ب دووماهی هاتنا خولێ ب دو گەڕان ل یاریگەها سێمێلێ هاتیە كرن.
بڤێ ئەنجامێ كوڕێن سێمیلێ ئەو هیڤی و ئارمانجێن بۆ وەرزێ نایاب دانایی ژ دەستدان و پاشڤە چوو رێزا پێنجێ ب كۆمكرنا 23 خالان ژ حەفت سەركەفتن، دو وەكهەڤی، ئەوا تیما پیشەسازی ب 33 خالان سەرێ لیستێ دهێت، ڕزگاری ب31 خالان رێزا دویێ، كۆیە ب 29 خالان رێزا سێیێ و قەدزێ ب23 خالان رێزا چارێ دهێت.
ژلایەكێ دووڤە تیما یانەیا تەناهی ب رێژەكا مەزن مانا خوە د خولێ دا پاراست پشتی دگەل مێڤانا خوە شۆرجە یا كەركووكی ب گۆلەكێ وەكهەڤبووین، تەناهی ب 12 خالان رێزا 12ێ دهێت ژ سێ سەركەفتن، سێ وەكهەڤی.
د رێنمایێن فیدراسیۆنا فوتبۆلا كوردستانێ دا دو یانەیێن رێزێن ئێكێ و دویێ ئێكسەر دێ دەربازبنە پلا نایاب، یانەیا سێیێ دێ د ڤاڤارانێن پاشكۆیێ دو یاریێن ڤەبڕ دگەل یانەیا خودانا رێزا 14ێ یا پلا نایاب یاریێ كەن ژبۆ ئێكلاكرنا پلێتەكا نایابێ، هەروەسان دو یانەیێن رێزبەندییا 15و 16 یێن پلا ئێك دێ پاشڤە چنە پلا دو.
