11 كــەس ژ بەر داربڕینێ و تێكدانـا ژینگــەهێ هــاتینە دەستەسەركرن
ئەڤرۆ
ئەڤرۆ، زنار تۆڤی:
بەرپرسێ هێزێن پێشمەرگێ پاراستنا ژینگەهێ ل پارێزگەها دهۆكێ، بۆ رۆژناما ئەڤرۆ دیار كر، سێ كەسان ل سنوورێ ئیدارا سەربخوە یا زاخۆ هەژمارەكا زۆر یا دارێن مەزن بریبوون و سۆتبوون و وان كارگەهەكا رەژییێ چێكربوو، ئەو شیان وان هەرسێ كەسان دەستەسەر بكەن و ل دووڤ قانوونێ دێ پێرابوون ل گەل هێنە كرن، هەروەسا هێزێن پاراستنا ژینگەهێ بەری چەند رۆژان شیان شەش كەسان ب بیكەمێن دارێن تەرڤە ل سنوورێ ناوچەداریا ئەترووشێ و دەوروبەرێن ناناوچەداریا زاویتە بگرن.
عەمید جەمال سەعدو كوركی، بەرپرسێ هێزێن پێشمەرگێ پاراستنا ژینگەهێ گۆت: «د ئەڤ سالە دا هێزێن مە شییاینە 11 كەسان ژ بەر بڕینا داران و تێكدانا ژینگەهێ دەستەسەر بكەن، لێ د سالا بۆری دا 24 كەس سەرا بڕینا داران هاتبوونە دەستەسەركرن و د سالا 2021 ێ 46 كەس سەرا بڕینا داران و تێكدانا ژینگەهێ هاتبوونە دەستەسەركرن، ئەو كەسێن مە گرتین ژی هەموو ئەون یێن، كو بازرگانیێ ب داران دكەن و داران دفرۆشن و مە پێرابوونێن توند د دەرهەقێ وان دا وەرگرتینە، دیسا مەفرەزێن مە یێن گەرۆك ژی ب رەنگەكێ بەردەوام چاڤدێریا ژینگەهێ دكەن».
ناڤهاتی گۆتژی: «ئەڤ سالە سەرپێچی یێن دیتر ژی هەبووینە، دەربارەی كوشتنا كەوان، د ئەڤ سالە دا مە نەه كەس گرتینە و ل سالا بۆری مە دو كەس سەرا كوشتنا كەوان گرتبوون، لێ ئەڤ سالە ئەو رێژە پتر بوویە و خەلك دچنە شەڤیارێ و كەوان دكوژن، بەلێ هێزێن پێشمەرگێ پاراستنا ژینگەهێ ل هەموو جهان چاڤدێریا ژینگەهێ دكەن و رێكێ ل وان كەسان دگرن یێن، كو بزاڤێن تێكدانا ژینگەهێ دكەن».
