11 گۆڕێن ب كۆم یێن سەردەمێ ئەنفالێ ل سەماوە هاتینە دیتن
هەولێر، قائید میرۆ:
جێگرێ سەرۆكێ لیژنا شەهیدان ل پەرلەمانێ ئیراقێ ئاشكرا كر، هەژمارەكا بەرچاڤ یا گۆڕێن ب كۆم یێن كوردان ل بیابانێن سەماوە هاتینە دیتن و دبێژیت: پێدڤیە كار بۆ كۆلانا وان گۆڕێن ب كۆم بهێتە كرن و روفاتێن وان بهێنە دەرئێخستن.
شوان كەلاری، جێگرێ سەرۆكێ لیژنا شەهیدان ل پەرلەمانێ ئیراقێ بۆ رۆژناما ئەڤرۆ دیار كر، ئەڤە چار سالە 171 روفاتێن ئەنفالكریێن كورد ل نۆشداریا دادن ل بەغدا و هەتا نوكە پشكنین بۆ نەهاتیە كرن هەتا بهێنە ئێكلاكرن و گۆت: «ئەڤە بۆ خەمساریا حوكمەتا ئیراقێ ڤەدگەڕیت، چونكی ل گورەی قانوونێ ئەركێ حوكمەتا ئیراقێ یە پشكنینێ بۆ هەموو روفاتان بكەت و بهێنە ئێكلاكرن».
شوان كەلاری گۆتژی: «هەر نێزیك وی گۆڕێ ئەو 171 روفات تێدا هاتینە دیتن 11 گۆڕێن دی یێن ب كۆم هەنە و هەموو ژی یێن وەلاتیێن كورد یێن سەردەمێ ئەنفالێ نە، كو هاتینە شەهید كرن، پڕانیا روفاتێن د ناڤا وان گۆڕێن ب كۆم دا ژن و زارۆكن، من ب خوە سەرەدانا بیابانێن سەماوە كریە و هەژمارەكا زۆرا گۆڕێن ب كۆم تێدا هەنە یێن سەردەمێ رژێما بەعسن، بەلێ پێدڤیە كار تێدا بهێتە كرن».
