12 سالن دهۆك د ناڤ ڕێزێن هەلبژارتیێ ئیراقێ دا پشكدار
پشتی ب دووماهی هاتنا گەڕا چوارێ و فینالێ ژ هەڤڕكیێن خولا ئیراقێ یا یارییا پایسكلان ئەوا ل حەفتییا بۆری باژێرێ دهۆكێ هاتیە كرن، ب فەرمی فدراسیۆنا پایسكلڤانێن ئیراقێ یاریزانێن پێشەنگ ل سەر ئاستێن جودا داخوازكرنە ناڤ ڕێزێن هەلبژارتیێن ئیراقێ خوە بەرهەڤكرن بۆ هەردو قارەمانیێن و ئاسیایی، یا عەرەبی ئەوا بڕیارە هەڤڕكیێن وێ ل دووماهییا چرییا ئێكێ یا بهێت ل حەلەبچە بهێتە كرن و خولا یاریێن ئاسیایی ئەوا دێ ل چریا دویێ ل وەلاتێ بەحرەینێ هێتە كرن، ڕاهێنەرەك و سێ یاریزانێن دهۆكێ بۆ ناڤ ڕێزێن تیما لاوان و تازەپێگەهشتییان هاتنە گازیكرن.
لدۆر دووماهی پێزانینان هشیار فەریق سەرۆكێ لژنەیا دادڤانان ل فدراسیۆنا ئیراقێ و سەرپەرشتێ تیما دهۆكێ بۆ ئەڤرۆ گۆت: ب دووماهی هاتنا وەرزێ 2025ێ یا قارەمانییا پایسكلان ل سەر هەموو ئاستان یاریزانێن پێشەنگ بۆ ناڤ ڕێزێن هەلبژارتیێ ئیراقێ هاتنە داخوازكرن ژبۆ دانانا بەرنامە و كەمپێن ڕاهێنانێ خوە بەرهەڤكرن بۆ دو قارەمانیێن مەزن، ئەوژی قارەمانییا عەرەبی ل 23ێ چڕیا ئێكێ یا بهێت حەلەبچەیا شەهید مێڤاندارییا وێ بكەت، دیسان دەستپێكا چرییا دویێ یا بهێت وەلاتێ بەحرەیین مێڤاندارییا قارەمانییا یاریێن خولا ئاسیایی بكەت.
هەروەسان ناڤهاتی گۆت: ب خوەشحالی ڤە چار كەس ژ یانەیا دهۆك و دو خەلكێ دهۆكێ دێ دناڤ ڕێزێن هەلبژارتیێ ئیراقێ دا بن و بڤی شێوەیی، تارق عەبدولرەحمان ڕاهێنەرێ تیما یانەیا دهۆك بۆ هەلبژارتیێ ئیراقێ ل سەر ئاستێ تازەپێكەهشتییان دیسان هەر ئێك ژ ئاڤەند هشیار فەریق، یوسف جیهاد و عیسام عەلی وەكو نوونەرێن پارێزگەهێ دگەل هەلبژارتیێ ئیراقێ، زێدەباری دو یاریزانێن دی یێن خەلكێ باژێرێ دهۆكێ دناڤ ڕێزێن هەلبژارتیێ ئیراقێ وەهبی سلێمان و سەربەرست عەبدوللا ل سەر ئاستێ پێشكەڤتیان كو هەردو پێشتر یاریزانێن یانەیا دهۆكێ بوون، ئەڤەژی بەلگەیە ب هەبوونا یاریزانێن خودان شیان ل پارێزگەهێ.
هشیار فەریقی ئەوچەندە ژی گۆت: لدووڤ بەرنامەیێ سالانە یێ فدراسیۆنێ د ماوەیێ سالێ دا چار قۆناغ ژ قارەمانییا ئیراقێ بۆ ئاستێن جودا دهێنە كرن، لێ د وەرزێ ئەڤ سالە دا زوورتر قارەمانی هاتە كرن و ب دووماهی هات ژبەر هەبوونا دو قارەمانیێن مەزن ئێك ژ وان دێ ل پارێزگەها حەلەبچە هێتە كرن، لەوما ژی قۆناغا سێیێ و چارێ دماوەیێ حەفتییەكێ دا دناڤبەرا هەردو باژێرێن هەولێر و دهۆكێ هاتنە كرن پێخەمەت دەلیڤەدا بۆ بەرهەڤكرنا هەلبژارتیێن ئیراقێ بۆ هەردو قارەمانییان.
بۆ زانین ئەنجامێن گشتی یێن تیما لاوێن یانەیا دهۆك بڤی شێوەیی بوون د قۆناغا ئێكێ دا ڕێزا دویێ هاتبووین ب دەمەكێ كێم ئەوا یانەیا سیناعە ڕێزا ئێكێ هاتی، د قۆناغا دویێ دا ڕێزا ئێكێ ب دەستڤە ئینا بوو ئەوا ل پارێزگەها كەربەلا هاتییە كرن، ل قووناغا سێیێ دا ڕێزا دویێ هاتبوون بتنێ 34 چركە كێمتر بوون ژخودانا ڕێزا ئێكێ سیناعە، د قووناغا چارێ دا سەرباری ڕێزا دویێ هاتبوو لێ ڕیمونتادا ئینا و شیا پێشكەڤیت ل سەر یانەیا سیناعە ب كۆمڤەكرنا دەمی یا گشت قووناغا كو دبیتە ڤەڕێژا قارەمانیێ و دیاركرنا ڕێزبەندیێ، زێدەباری كونترۆلكرنا یاریزانێ دهۆكێ ل سەر ئاستێ پشكۆژانن عەبدولرەحمان شڤان رێزا ئێكێ و دویێ د هەرچار قووناغان دا هاتییە.
