120 میگاواتێن كارەبێ ل كواشێ دێ هێنە بەرهەمئینان
هەولێر، قائید میرۆ:
پەیڤدارێ وەزارەتا كارەبێ ل حوكمەتا هەرێما كوردستانێ ئاشكرا كر، رێژەیا بەرهەمئینانا كارەبێ بۆ ئەڤ سالە دێ هێتە زێدەكرن و ل پارێزگەها دهۆكێ ژی ل كواشێ دێ 120 میگاواتێن كارەبێ هێنە بەرهەمئینان و رەوشا كارەبێ ژ سالا بۆری دێ باشتربیت.
ئومێد ئەحمەد، پەیڤدارێ وەزارەتا كارەبێ بۆ رۆژناما ئەڤرۆ دیار كر، ب رێیا سێ وەستگەهێن كارەبێ، ئەڤ سالە رێژەیا بەرهەمئینانا كارەبێ دێ هێتە زێدەكرن و گۆت: «د دەمێ نوكە دا 250 مێگاوات ل وەستگەها بازیان و 150 مێگاوات ل هەولێرێ هاتینە زێدەكرن، ل كواشێ ژی ل دهۆكێ دێ بیتە گازوایل و 120 میگاواتێن كارەبێ دێ هێنە بەرهەمئینان، ب ڤێ چەندێ دێ رێژەیا بەرهەمئینانا كارەبێ زێدەبیت ل سەر ئاستێ هەرێما كوردستانێ، چونكی ئەو كارەبا دهێتە بەرهەمئینان دچیتە ناڤا تۆڕا نیشتمانی دا».
ئومێد ئەحمەد گۆتژی: «وەزارەتا كارەبێ پلانا ئەڤ سالە بەرهەڤكریە و ل گورەی پلانا هاتیە بەرهەڤكرن دێ رەوشا كارەبێ ل هاڤینا ئەڤ سالە ژ سالا بۆری باشتربیت، چونكی د دەمێ نوكە دا رێژەیا بەرهەمئینانا كارەبێ گەهشتیە زێدەتری چار هزار مێگاواتێن كارەبێ و ئەگەر چو ئاریشە د دەمێ وەرزێ گەرمێ دا پەیدا نەبن، ئەڤە دێ رەوشا كارەبێ یا باشبیت».
