125 زارۆ د نه‌ڤرۆزێ دا ل پارێزگه‌ها دهۆكێ ژ دایكبووینه
دهۆك: له‌زگین جوقی:
ساخله‌میا پارێزگه‌ها دهۆكێ ئامارێن جه‌ژنا نه‌ڤرۆزێ راگه‌هاندن، كو هه‌ر ژ رۆژا 20/3 هه‌تا 23/3/2022ێ، چار هزار و 532 نه‌خۆشان سه‌ره‌دانا ده‌زگه‌هێن ساخله‌میێ كرینه، ژ وان ژی 402 نه‌خۆش یێن هاتینه نڤاندن و 73 نشته‌رگه‌ری ژی هاتینه ئه‌نجامدان، دیسا د سێ رۆژێن نه‌ڤرۆز دا 125 زارۆ ژ دایكبووینه، ژ وانا ژی 73 كوڕ و 52 كچ بووینه و 26 روودانێن ترۆمبێلان ژی یێن هاتینه تۆماركرن و سێ روودانێن ب شه‌رچوونێ ژی یێن هاتینه تۆماركرن.
حه‌مزه ره‌زیكی، به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ د كۆنگره‌كێ رۆژنامه‌ڤانی دا دیار كر كو د سێ رۆژێن نه‌ڤرۆز دا، شه‌ش كه‌س ژ بلنداهیان كه‌فتینه و 19 كه‌سان ژی گیانێ خوه ژ ده‌ست دایه، كو 10 كه‌س ژ وان ژ ئه‌گه‌رێ نه‌خۆشیان بووینه و 9 كه‌س ژی ژ ئه‌گه‌رێ روودانێن هه‌مه‌جۆر گیانێ خوه ژ ده‌ست دایه، دو كه‌سان ژی ب گولله‌یێن ئاگری گیانێ خوه ژ ده‌ست دایه، دیسا سێ روودانێن سۆتنێ و روودانه‌كا خوه‌كوشتنێ و سێ روودانێن ترۆمبێلان رووداینه، 17 كه‌سان ژی ل جه‌ژنا نه‌ڤرۆزێ گاز ڤه‌خواریه و 47 حاله‌تێن شووشتنا گولچیسكان و 53 خاله‌تێن سۆتنێ هاتینه تۆماركرن.
ره‌زیكی ئاشكرا ژی كر كو تیمێن 122ێ ژی پتر ژ 700 په‌یوه‌ندیان پێ هاتینه كرن، ئه‌و ژی حاله‌تێن بێهنته‌نگیێ و ئێشانێن سینگی و زكی و روودانێن ترۆمبێلان و گاز ڤه‌خوارن و كه‌فتن و هنگاڤتن بووینه، دیسا دو هزار و 434 پشكنینێن كۆرۆنایێ یێن هاتینه ئه‌نجامدان و 24 كه‌س د رۆژێن جه‌ژنا نه‌ڤرۆزێ دا تووشی كۆرۆنایێ بووینه، لێ چو نه‌خوشێن كۆرۆنایێ گیانێ خوه ژ ده‌ست نه‌دایه.
