136 زارۆ د رۆژێن جه‌ژنا ره‌مه‌زانێ دا ل دهۆكێ ژ دایكبووینه
دهۆك، له‌زگین جوقی:
به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ د كۆنگره‌كێ رۆژنامه‌ڤانی دا دیار كر، د رۆژێن جه‌ژنا ره‌مه‌زانا پیرۆز دا پتر ژ چار هزار كه‌سان سه‌ره‌دانا ده‌زگه‌هێن ساخله‌میێ ل دهۆكێ كرینه و 136 زارۆ ژ دایكبووینه و 18 كه‌سان ژی ژ ئه‌گه‌رێ نه‌خۆشیان و روودانان گیانێ خوه ژ ده‌ست دایه.
حه‌مزه ره‌زیكی، به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ گۆت: “د رۆژێن جه‌ژنا ره‌مه‌زانێ دا 18 حاله‌تێن مرنێ ل دهۆكێ هه‌بووینه، 15 ژ وان ژ ئه‌گه‌رێ نه‌خۆشیان گیانی خوه ژ ده‌ست دایه و سێ كه‌سان ژی ژ ئه‌گه‌رێ روودانان گیانێ خوه ژ ده‌ست دایه و كه‌سه‌كی خوه كوشتیه، دیسا حه‌فت حاله‌تێن كه‌فتن ژ بلنداهیان هاتینه تۆماركرن و 27 نه‌خۆشان ژ به‌ر روودانێن سۆتنێ قه‌ستا ساخله‌میێ كرینه پتریا وان ژ نه‌خۆشخانان هاتینه ده‌رئێخستن و ره‌وشا وان باشبوویه”.
گۆتژی: “تیمێن زێره‌ڤانیا ساخله‌میێ شیاینه سه‌ره‌دانا 28 جهێن كاركرنێ بكه‌ن، ژ وانا ژی سێ خوارنگه‌ه هاتینه دائیخستن و دو جه ژی هاتینه سزادان، دیسا چه‌ندین كه‌سان په‌یوه‌ندی ب تیمێن هه‌وارهاتنا بله‌ز كریه و بۆ نه‌خۆشخانه‌یان هاتینه ڤه‌گوهاستن و 11 نشته‌رگه‌ریێن قه‌سته‌را دلی یێن بله‌ز هاتینه ئه‌نجامدان”.
حه‌مزه ره‌زیكی زێده‌تر گۆت: “د رۆژێن جه‌ژنێ دا ره‌وشا پتر ژ 200 كه‌سان باش نه‌بوویه و ل نه‌خۆشخانه‌یان هاتینه نڤاندن ب مه‌ره‌ما وه‌رگرتنا چاره‌سه‌ریێ و 22 نشته‌رگه‌ریێن جوراوجور هاتینه ئه‌نجامدان و 136 زارۆ ژ دایكبووینه و 27 كه‌س تووشی روودانێن ترۆمبیلان بووینه و قه‌ستا ده‌زگه‌هێن ساخله‌میێ كرینه و 13 روودانێن ب شه‌رچوونێ هاتینه تۆماركرن”.
