14 رێكخراو داخوازا دادگه‌هه‌كا تایبه‌ت بۆ سزادانا تاوانبارێن جینۆسایدێ دكه‌ن
دهۆك، له‌زگین جوقی:
به‌رپرسێ سازیا ئێزدیان بۆ به‌رهنگاریا جینۆسایدێ دیار كر، 14 رێكخراوان ل سه‌ر ئاستێ جیهانێ ل جنێڤا وه‌لاتی سویسرا داخواز كرن دادگه‌هه‌كا تایبه‌ت بۆ سزادانا تاوانبارێن جینۆسایدێ بهێته پێكئینان و كار بۆ روو ب رووبوونا جینۆسایدێ و پشته‌ڤانیا قوربانیان بهێته كرن.
حه‌سۆ هورمی، به‌رپرسێ سازیا ئێزدیان بۆ به‌رهنگاریا جینۆسایدێ ل كه‌ندا بۆ رۆژناما ئه‌ڤرۆ راگه‌هاند: “14 رێكخراو و ده‌زگه‌ه و سازیێن مه‌ده‌نی هه‌ڤپه‌یمانیه‌ك دروستكریه بۆ رووب رووبوونا جینۆسایدێ و پشته‌ڤانیكرنا قوربانیانیێن جینۆسایدان، ژ وانا: ده‌زگه‌هێ خێرخوازیێ بارزانی، سازیا ئیزدیان بۆ به‌رهنگاریا جینۆسایدێ، سه‌نته‌رێ زاغروس بۆ مافێ مرۆڤی، مالوكا ده‌ولیه و تامیل ئوزاغام و كومسیۆنا THENDRAL و كۆمه‌لا قوتابیێن تامیل ل فره‌نسا و بنگه‌هێ كۆمه‌لا بهاراتی یێ ره‌وشه‌نبیری ل فرانكۆ و ریكخراوا جسر و چه‌ند سازی و رێكخراوێن دی ل جیهانێ هه‌ڤپه‌یمانیه‌ك ئیمزا كرن بۆ به‌رهه‌نگاریا جینۆسایدێ”.
گۆتژی: “ئه‌ڤه پێنگاڤه‌كا گه‌له‌كا گرنگه هاتیه هاڤێتن بۆ روو ب رووبونا جینۆسایدان ل جیهانێ، ڤان رێكخراوان هنده‌ك داخوازی كرن ژ وانا ژی دادگه‌هه‌كا تایبه‌ت بۆ روو ب رووبوونا جینۆسایدێ و پشته‌ڤانیا قوربانیێن جینۆسایدێ بهێته پێكئینان، حكومه‌تا عیراقێ ببیته ئه‌ندام د روما دا بۆ هندێ دادگه‌ها لاهای كارێ خوه ئه‌نجام بده‌ت”.
حه‌سۆ هورمی ئه‌وژی گۆت: “ڤان هه‌موو رێكخراوا داخواز كرن ده‌نگێ رێكخراوان بهێزتر بیت بۆ جینۆسایدێ و رێكخراو پتر د وارێ دادپه‌روه‌ریێ دا كار بكه‌ن و قانوونێن ناڤخوه‌یی ل ده‌وله‌تان پشته‌ڤانیا قوربانیێن جینۆسایدێ بكه‌ن و هه‌موو كار بهێنه كرن جینۆساید نه‌مینن”.
