15سال و پەیڤێن چارشەمبێ نیڤرۆ پێكڤە هاتنە ئیمزاكرن
شاكر ئەتروشی:
ئێكەتیا نڤیسەرێن كورد/تایێ دهۆكێ، ل ئێڤاریا رۆژا چارشەمبی رێكەفتی 8/5/2024 چالاكیەكا رەوشەنبیری بۆ خانما هەلبەستڤان (رۆندك مزووری) ل هولا نڤیسەران گێڕا و هەردو پرتووكێن وێ (15 سال و پەیڤێن چارشەمبێ نیڤرۆ) پێكڤە هاتنە ئیمزاكرن و ب دیاری ل سەر بەرهەڤبوویان هاتنە بەلاڤكرن.
ل دەستپێكێ نڤیسەر (سەلام بالایی) خواندنەك دا پرتووكا (پەیڤێن چارشەمبێ نیڤرۆ) كو دەه چیرۆكێن زارۆكانە ب زمانێ هولەندی هاتینە نڤیسین و خانم رۆندك ب كارێ وەرگێرانا وان رابوویە یۆ سەر زمانێ كوردی و ئنگلیزی و ژ كۆما دەه چیرۆكان سێ چیرۆك كرنە نموونە و چەندەكێ ل سەر ئاخفت، د دووڤدا هەلبەستڤان (رۆندك مزۆری) چەند هەلبەست ژ پرتووكا خوە (15 سال) خواندن و مۆزیكژەن (سالار جەمیل) ب ژەنینا چەند پارچەیێن ئاوازان ب كەمانا خوە پشكداری دوێ بڕگێ دا كر و ل دووماهیێ هونەرمەندێ مەزن (عەبدولعەزیز سلێمان) ب خواندنا هەلبەستەكێ و گۆتنا چەند سترانان ب دەنگێ خوە كو رەوشەكا دی دا وێ چالاكیێ ئەوب دووماهی ئینا.
هەروەسا رێڤەبەریا رەوشەنبیری و هونەری ل زاخۆ، ل بەرە ئەڤرۆ رۆژا ئێكشەمبی ل دەمژمێر پێنجی ئێڤاری مێڤاندریا خانم رۆندك مزوری بكەت و ئەو هەردو پرتووك دێ ل وێرێ ژی هێنە ئیمزاكرن و بەلاڤكرن، هەروەسا دێ خواندنەك د هەردو پرتووكان دا ژلایێ نڤیسەر(حەجی حامد هرۆری) بۆ هێتە كرن.
