15 كەس ل زاخۆ ل سەر خراب ب كارئینانا تۆڕێن جڤاكی هاتنە دەستەسەركرن
زاخۆ، دلۆڤان هالۆ:
ئەحمەد ڕەمەزان، بەرپڕسێ ڕاگەهاندنا ڕێڤەبەریا پۆلیسێن زاخۆ بۆ ڕۆژناما ئەڤرۆ دیار كر، ل سنوورێ ئیدارەیا سەربخوە یا زاخۆ، 15 كەسێن تەمەنێ وان د سەر 18 سالیێ دا ب تۆمەتا خراب ب كارئینانا تۆڕێن جڤاكی هاتنە دەستەسەركرن.
بەرپڕسێ ڕاگەهاندنا ڕێڤەبەریا پۆلیسێن زاخۆ ئاماژە ب وێ چەندێ ژی كر، د دەمێ دەربازبوویی دا تاوانێن گرێدایی خراب ب كارئینانا تۆڕێن جڤاكی وەكو هەڕەشەكرن ب بەلاڤكرنا وێنەیان و بەلاڤكرنا وێنەیان بێی دەستووری و سڤكاتیكرن ب كەسایەتی و وەلاتیان و كۆمێنتێن دوور ژ دابونەریتان ل ئیدارەیا سەربخوە یا زاخۆ بەربەڤ ببوون و گۆت «مە هەژمارەكا سكالایان ل بنگەهێن پۆلیسان و نڤیسینگەها نەهێلانا گۆنەهباریان هەبوون».
گۆتژی: «ئەڤان جهێن تایبەتمەند ب ڤەكۆلینێ ڤە، فۆكسا خوە ئێخستە سەر ڤان جۆرە تاوانان و شیان د دەمەكێ كێم دا 15 تۆمەتباران ل سەر ڤان تاوانێن گرێدایی خراب ب كارئینانا تۆڕێن جڤاكی دەستەسەر بكەن».
زێدەتر گۆت: «هەمی تۆمەتبار ب بەلگەڤە هاتنە ڕەوانەكرن بۆ دادگەهێ و دۆزێن وان ل سەر بەندێ دو ژ یاسا هەژمارە شەش یا سالا 2008ێ بوون».
