150 دەلیڤەیێن كاری بۆ گەنجان هاتنە راگەهاندن
دهۆك، دلڤین رەشید:
دلگەش سادق، سەر پەرشتێ پێشانگەها دەلیڤەیێن كاری بۆ رۆژناما ئەڤرۆ دیاركر، ئارمانج ژ ڤێ پێشانگەهێ دابینكرنا دەلیڤەیێن كاریە بۆ گەنجان، ب رێكا هەڤگەهاندنا وان ل گەل خووەدان كار و كۆمپانیێن د بیاڤێ جودا دا كار دكەن و پەیداكرنا دەلیڤەیێن چاڤپێكەفتن و دانوستاندنانە د ناڤبەرا لاوان دا، كو تیدا 150 دەلیڤەیێن كاری بۆ گەنجان هاتینە تەرخانكرن، دیسا هەژمارەكا خۆلێن راهێنانێن پیشەیی ژ لایێ كۆمپانیان و خودان كاران ڤە ژبۆ گەنجان هاتینە دابینكرن.
ناڤهاتی گۆت: «د ناڤا ڤێ پێشانگەهێ دا 72 لایەن تێدا پشكدارن، ژ وانا ژی كۆمپانی نە رێكخراون و وەبەرهێنەرن ل گەل چار رێڤەبەرێن پەیوەندیدار ب كار و دەستەبەركرنا جڤاكی و كرێكاران ڤە، ئەڤ پێشەنگەهە بۆ هەموو گەنجانە و ئەڤ جۆرە پێشانگەهە گەلەك دگرنگن ژ بۆ گەنجان، كو ب شێوەیەكێ ب سەناهی بۆ خۆ دەلیڤەیێن كاری پەیدا بكەن».
گۆت ژی: «ئەڤ پێشانگەهە ژ لایێ سەنتەرێ گەشەپێدانا كاری ل زانكۆیا دهۆك و رێكخراوا ستێپ بۆ دیموكراسی و هەلبژارتنان ل هۆلا كۆنفرانسان ل زانكویا دهۆك هاتیە رێكخستن».
