1559 كه‌سا مفا ژ خولێن مه‌شق و راهێنانا په‌روه‌ردێ ديتيه
ئه‌ڤرۆ نيوز:
رێڤه‌به‌را مه‌شق و راهێنانان ل رێڤه‌به‌ريا گشتيا په‌روه‌ردا پارێزگه‌ها دهۆكێ شرین سالم خویاكر كو كارێ وان یێ سه‌ره‌كێ ڤه‌كرنا خولايه بۆ مامۆستایێن بنه‌ره‌ت و ئاماده‌یی هه‌روه‌سا سه‌رپه‌رشتیار و هاریكار و رێڤه‌به‌رێن قوتابخانا و فه‌رمانبه‌رێن په‌روه‌ردێ.
زێده‌تر گۆت:”ئه‌م خولێن جودا ڤه‌دكه‌ين كو يێن سيسته‌مى و پرۆگرامانه بۆ نموونه ده‌ما پرۆگرامه‌كێ خواندنێ دهێته گوهۆڕين، بۆ بهێزكرنا مامۆستايان ل سه‌ر وى پرۆگرامى خۆل بۆ دهێنه ڤه‌كرن، ديسا خۆلێن كارگێرى ژى بۆ هاريكار و رێڤه‌به‌رێن هاريكارێن قوتابخانا دهێنه ڤه‌كرن”.
ئاماژه ب وێ چه‌ندێ ژى كر كو ڤه‌كرنا خولان ل ده‌ف وان په‌يوه‌نديه‌كا ئێكسه‌ر يا ب بودجێ ڤه هه‌يى و گۆت: “بودجا مه ئێك ل سه‌ر 12ێ يا رێڤه‌به‌ريا گشتيا په‌روه‌ردا پارێزگه‌ها دهۆكێ يه، به‌لێ ئه‌ڤه ژ 2014ێ وه‌ره ژ به‌ر قه‌يرانا دارايى يا نوكه ل كوردستانێ هه‌يى، ئه‌ڤ ساله وه‌زيرێ په‌روه‌ردێ بڕيار دا كو پشكه‌ك ژ داهاتێ فرۆشگه‌هێن قوتابخانا بۆ رێڤه‌به‌ريا مه بهێته مه‌زاختن بۆ ڤه‌كرنا خولان”.
رێڤه‌به‌را رێڤه‌به‌ریا مه‌شق و راهێنانان یا سه‌ر ب رێڤه‌به‌ریا گشتی یا په‌روه‌ردا پارێزگه‌ها دهۆكێ ڤه دازانین كو ژ ده‌سپێكا سالا 2015ێ و هه‌تا نوكه هزار و 559 مامۆستا ژ خۆلێن وان د مفادار بووينه.