16 هزار و 600 خێزانێن ئاوارە دێ مووچەیێ چاڤدێریا جڤاكی وەرگرن
دهۆك، لەزگین جوقی:
بەرپرسێ راگەهاندنێ ل رێڤەبەریا كۆچ و كۆچبەرێن ئیراقێ ل پارێزگەها دهۆكێ دیار كر، د ناڤ كەمپێن ئاوارەیان دا ل دهۆكێ دەست ب تۆماركرنا ناڤێن ئاوارێن شنگالێ بۆ وەرگرتنا مووچەیێ چاڤدێریا جڤاكی هاتیە كرن.
محەمەد بەدەل حەمۆ، بەرپرسێ راگەهاندنێ ل رێڤەبەریا كۆچ و كۆچبەرێن ئیراقێ ل پارێزگەها دهۆكێ بۆ رۆژناما ئەڤرۆ دیار كر، 16 هزار 600 خێزانێن ئاوارە ناڤێن خوە بۆ وەرگرتنا مووچێ چاڤدێریا جڤاكی تۆماركرینە و گۆت: «نوكە د ناڤ كەمپێن شاریا، كەبەرتۆ ئیك و دو، شێخان، ئیسیان و مامرەشان دەست ب تۆماركرنا ناڤان هاتیە كرن، بەری نوكە ب رێیا لینكەكی فۆرم هاتینە پڕكرن لێ ناڤێن گەلەك ژ ئاوارێن شنگالێ هاتنیە رەتكرن و رازیبوون ل سەر نەهاتیە كرن، لەو ئەم یێ كار دكەین دووبارە خەلكێ خوە چێكەین، نوكە فۆرمەك بۆ كەسێن پێدڤی ب مووچێ چاڤدێریا جڤاكی هەی یا دهێتە پڕكرن».
ناڤهاتی ئاشكرا ژی كر كو ژبلی مووچێ چاڤدێریا جڤاكی هەتا نوكە ناڤێن 757 كەسێن تووشی فالنجیێ بووین و بووینە پەلكەفتی یێن هاتنیە تۆماركرن ئەو ژی ژ وەرگرتنا مووچێ چاڤدێریا جڤاكی دێ مفادار بن.
