163 ساله ئه‌ڤ پیانۆیه ل هه‌ولێرێ هاتیه پاراستن
هه‌ولێر، شاكر ئه‌تروشی:
كه‌سه‌كێ به‌رنیاسێ خه‌لكێ هه‌ولێرێ كو ئه‌ڤه بۆ ده‌مێ چه‌ندین سالانه ئاره‌زوویا كومكرنا تشتێن ئنتیكه و یێن كه‌ڤن هه‌یه، د دیداره‌كێ دا بۆ ئه‌ڤرۆ دیاركر نوكه هنده‌ك تشت ل جهێ وی هه‌نه ره‌نگه ل كێم وه‌لاتان ئه‌و تشت هه‌بن و پاره‌كێ باش دده‌نێ لێ ئه‌و نا فرۆشیت، چنكو حه‌زناكه‌ت ئه‌و تشت ژ كوردستانێ ده‌ركه‌ڤن.
عه‌بدولخه‌بیر قادر عه‌بدوللا، خودانێ جهێ سروشت بۆ ئنتیك كو نوكه دژیێ (54) سالیێ دایه گۆت: به‌ری بیست سالان من دوكانه‌ك ل ته‌یراوا ڤه‌كر و تشتێن ئنتیكه دفرۆتن، لێ ئه‌ڤه چه‌ند ساله‌كا كارێ من به‌رفره‌ه بووی و من جهه‌كێ تایبه‌ت و مه‌زن ڤه‌كریه و هه‌موو كه‌رستێن خوه ئه‌ز ب خوه دچمه ژ ده‌رڤه‌ی وه‌لاتی دئینم، بۆ نموونه نوكه (پیانۆیه‌ك) ل ده‌ف من هه‌یه یا سالا (1858) ل له‌نده‌ن هاتیه چێكرن و نوكه ژی كاردكه‌ت گه‌له‌ك بكڕ هاتینه لێ ئه‌ز نافرۆشمێ چنكو دێ به‌نه ده‌رڤه‌ی وه‌لاتی و من نه‌ڤێت ژ كوردستانێ ده‌ركه‌ڤن، هه‌روه‌سا هنده‌ك جۆرێن سه‌ماوران ل ده‌ف من هه‌نه كو ب ره‌ژیێ كاردكه‌ن ژیێ وان پتری دوسه‌د سالانه، ل گه‌ل چه‌ندین جۆرێن چه‌كێ به‌رێ و رادیۆیێن كه‌ڤن كو ئه‌و ژی یێن به‌ری چه‌ندین سالانه و هه‌موو ژی كاردكه‌ن، ئانكو بتنێ تشتێ دروست ئه‌ز دئینم چنكو هه‌كه كارنه‌كه‌ن و بتنێ قه‌رقۆده بن ئه‌م چو مفای ژێ نابینین، هه‌روه‌سا هنده‌ك قاون ل ده‌ف من هه‌نه یێن سالا (1928).
ل دووماهیێ گۆت: به‌ری چار سالان قونسلێ كویتێ ل هه‌ولێرێ هاته جهێ من و گۆت ئه‌ز دێ هه‌موو تشتێن ته پێكڤه كڕم كا بهایێ وان چه‌نده بیّێژه، ئه‌ز رازی نه‌بووم چنكو ئه‌و دا هه‌موویان ڤه‌گوهێزیته وه‌لاتێ خوه.
