17 هزار پێشمەرگە دێ پارچەیێن ئەردی وەرگـرن
رێڤەبەرێ قانوونی ل وەزارەتا باژێڕڤانیێ ئاشكراكر، رازیبوون ل سەر ناڤێ نێزیكی 17 هزار پێشمەرگەیان ژ لایێ سەرۆكایەتیا جڤاتا وەزیران هاتیەدان، بۆ وەرگرتنا پارچەیێن ئەردی و دبێژیت: ل نێزیك دێ پرۆسەیا هنارتنا ناڤان ب دوماهی هێت و هەموو فەرمانبەر و خانەنشین و پێشمەرگە دێ پارچەیێن ئەردی وەرگرن.
سەربەست مەولود، رێڤەبەرێ قانوونی ل وەزارەتا باژێڕڤانیێ بۆ رۆژناما ئەڤرۆ دیاركر، هەتا نوكە رازیبوون ل سەر ناڤێ نێزیكی 450 هزار فەرمانبەران هاتیەدان بۆ وەرگرتنا پارچێن ئەردی و گۆت: «نێزیكی 20 هزار ناڤێن دی ماینە، پتریا وان كارمەندێن وەزارەتا ناڤخۆنە و هندەك ژی یێن وەزارەتێن دینە، ل چەند رۆژێن بهێن ئەو ژی بۆ سەرۆكایەتیا جڤاتا وەزیران دێ هێنە هنارتن، هەتا رازیبوون ل سەر ناڤێ وان بهێتەدان بۆ وەرگرتنا پارچەیێن ئەردی».
سەربەست مەولود گۆتژی: «رازیبوون ل سەر ناڤێ نێزیكی 17 هزار پێشمەرگەیان هاتیەدان بۆ وەرگرتنا پارچەیێن ئەردی، بەری نوكە ژی هژمارەكا پێشمەرگەیان رازیبوون وەرگرتبوو، د دەمێ نوكە دا ب تنێ 600 ناڤێن خانەنشینان ل سەرۆكایەتیا جڤاتا وەزیران ماینە بۆ وەرگرتنا رازیبوونێ و ئەگەر چو ئاریشە ل فۆرمێن نوكە ل وەزارەتێ مای نەبن، دێ دوماهی ب پرۆسەیا هنارتنا لیستا ناڤێ فەرمانبەران هێت بۆ وەرگرتنا پارچەیێن ئەردی».
