20 به‌ربژار بۆ كارگێریا یانا سێمێلێ خوه كاندید كرینه
ئه‌ڤرۆ.
بڕیاره ئه‌ڤرۆ ل ده‌مژمێر ده‌هێ سپێدێ ل هۆلا گرتیا بنگه‌هێ وه‌رزش و لاوێن سێمێلێ هه‌لبژارتنێن ده‌سته‌كا نوو یا كارگێریا یانا سێمێل یا وه‌رزشی بهێته كرن، ئه‌وا 20 كه‌سان خوه كاندید كرینه بۆ پۆستێن ئه‌ندامه‌تیا یانێ.
د داخویانیه‌كێدا سه‌فه‌ر جه‌عفه‌ر سه‌رۆكێ لژنا هه‌لبژارتنان ل رێڤه‌به‌ریا وه‌رزشی یا پارێزگه‌ها دهۆك بۆ رۆژناما ئه‌ڤرۆ گوت: ب پشكداریا 150 ده‌نگده‌رێن ده‌سته‌كا گشتی بڕیاره ئه‌ڤرۆ هه‌لبژارتنێن كارگێریا نوو یا یانا سێمێلێ بهێنه ئه‌نجامدان ئه‌وا 20 كه‌سان خوه كاندیدكر بۆ نیزیكی حه‌فت هه‌تا نه‌ه كورسیێن كارگێریێ كو دێ لدووڤ رێژا ده‌نگان بیت 50+1 ئه‌گه‌ر كێمتر ده‌نگ ئینان ده‌رناكه‌ڤیت و مه رێنومایێن تایبه‌ت هه‌نه و دێ لدووڤ یاسا وه‌رزشی یا ژماره16 بۆ سالا 1986ێ برێڤه‌چین، ب هیڤیا وێ یه‌كێ هه‌لبژارتنێن یانا سێمێلێ وه‌كو هه‌ر هه‌لبژارتنه‌كا یانێن دی یێن پارێزگه‌هێ ب شێوه‌كێ شه‌فاف و بێی كێماتی و بیێ ئاریشه ب رێڤه‌چوون و هه‌روه‌سان چو سكالا ژی نه هاتنه تۆماركرن، ئه‌ڤه وێ یه‌كێ دگه‌هینیت كاره‌كێ رێكوپێك دهاته كرن.
ژلایه‌كێ دووڤه ناڤهاتی ئه‌وچه‌نده ژی دیاركر كو پشتی یانا سێمێلێ دێ هه‌لبژارتنێن یانێن وه‌رزشی ل پارێزگه‌هێ هێته دائێخستن پشتی 11 یانێن وه‌رزشی هه‌لبژارتنێن خوه ئه‌نجامداین و گوت: ب ناڤێ رێڤه‌به‌رێ گشتی یێ وه‌رزشی ل هه‌رێما كوردستانێ و رێڤه‌به‌رێ وه‌رزشی ل پارێزگه‌ها دهۆكێ پیرۆزباهیا هه‌موو كارگێریێن نوو یێن یانا دكه‌ین ب هیڤییا وێ یه‌كێ چار سالێن بهێت بشێن خزمه‌تا وه‌رزشا یانا خوه و پارێزگه‌هێ بكه‌ن.
بۆ زانین ئه‌و یانێن هه‌لبژارتنێن خوه ئه‌نجامداین ئه‌وژی، دهۆك، ئاكرێ، ئامێدیێ، گاره، شێخان، سه‌نحاریب، ئافره‌تێن دهۆكێ، به‌رده‌ره‌ش، پۆلیته‌كنیك، میدیا و په‌ره‌شۆتڤانا، بتنێ هه‌ردو یانێن زاخۆ و ته‌ناهی نه هاتنه ئه‌نجامدن و بشێوێ ته‌كلیف كارگێریا یانا زاخۆ ده‌ست ب كاربوو و یانا ته‌ناهی كارگێریا به‌رێ دێ كارێ خوه كه‌ت.
