200 جۆرێن خوارن و شریناهیان د پەرتووكەكێ دا كۆمكرینە
سندس سالح سلێڤانەیی:
شینا رێكانی، كو ئێك ژ پشكدارێن سێیەمین فێستیڤالا تەحینا ئامێدیێ و بەرهەمێن خۆمالی بوو، ئەوا ل حەفتیا بۆری ل ئامێدیێ هاتیە ڤەكرن، د دیدارەكێ دا بۆ رۆژنامەیا ئەڤرۆ دیاركر كو ڤەكرنا وان جۆرە فێستیڤالا گەلەك گرنگیا خوە هەیە، ب تایبەت ل دەڤەرا ئامێدیێ، چنكو ئەو دەڤەر ب چاندنێ یا ناڤدارە و سالانە گەلەك جۆرێن بەرهەمان ب تایبەت ژی (تەحین) ژێ دهێت و ئەڤ قێستیڤالە دبیتە دەرگەهەك كو خەلكێ دەڤەرێ بشێن بەرهەمێن خوە لێ بفرۆشن و دخوازین بۆ سالا بهێت ب رەنگەكێ بەرفرەهتر بهێتە ڤەكرن.
هەروەسا گۆت: بەری نوكە من پەرتووكەك ل دۆر نێزیكی 200 جۆرێن خوارنان و شریناهیان ب هەر دو زمانێن كوردی و عەرەبی چاپكربوو، گەلەك جۆرێن وان خوارن و ڤەخوارنان یێن من ب خۆنە، لەورا كەسێن سەرەدانا فێستیڤالێ كرین، ب تایبەت ژی كچ و ژنان گەلەكان ئەو پەرتووك كرین و ئەز ب باوەرم دێ مفایەكێ باش ژێ وەرگرن.
