200 ملیۆن یۆرۆ گرێبەستا ئێك سال یا نەیماری یە
راپۆرتێن رۆژنامەڤانی دۆپات كریە یانەیا هیلال یا سعۆدیێ رژدە ب ئینانا ستێرێ بەرازیلی و یانەیا پاریس سانجێرمان یا فرەنسی نەیمار دا سێلڤا پشتی بزاڤێن رازیكرنا ستێرێ ئەرجەنتینی لیۆنێل مێسی سەر نەگرتین.
ل دووڤ تۆرا سی بی ئێس سپۆرت یا ئەمریكی دیار كر نوكە یانەیا هیلال شاندەكێ پلە بلند ل پاریسێ پایتەختێ فرەنسا نە ژبۆ رازیكرنا ستێرێ بەرازیلی نەیمار دا سیلڤا بۆ ئیمزاكرنا گرێبەستا وان پشكداری د خولا رۆشن یا سعۆدیێ دا بكەت و كۆژمەیێ 200 ملیۆن یۆرۆ وەكو گرێبەستا سالەكێ دێ پێشێشی نەیماری كەن و ئەو شایستە و پاداشتێن بۆ كریستیانۆ رۆنالدۆیی یاریزانێ نەسر هاتینە دانان ب هەمان شێوە دێ بۆ نەیماری ژی هێنە دابینكرن.
ژلایەكێ دووڤە دیاركر یانەیا هیلال بەرهەڤە كۆژمێ 45 ملیۆن یۆرۆیان ب دەتە یانەیا پاریس سانجێرمان ژبۆ دەست ژێ بەردانا وی، ئەوا گرێبەستا نەیماری هەتا 2025ێ یا بەردەوامە، یانەیا فرەنسی رێگر نابیت لێ یاریزانی دڤێت بچیتە یانەكا مەزن ل ئۆرۆپا و هەكە چو یانە نەبوون دێ دگەل شاندێ یانەیا هیلال كۆمبیت ژبۆ گەنگەشەیا گرێبەستێ.
