220 خێزانێن به‌رواری بالا ژ ئه‌نجامێ شه‌ڕێ په‌كه‌كێ و توركیا ئاواره بووینه
ئه‌ڤرۆ، زنار تۆڤی:
رێڤه‌به‌رێ ناحیا كانی ماسێ بۆ رۆژناما ئه‌ڤرۆ دیار كر، 220 خێزان ل گوندێن سه‌ر ب ناحیا كانی ماسێ ڤه ژ ئه‌نجامێ شه‌ڕێ د ناڤبه‌را په‌كه‌كێ و سۆپایێ توركیا دا ئاواره‌ی باژێرێ دهۆكێ و زاخۆ بووینه.
سه‌ربه‌ست سه‌بری ئاكره‌یی، رێڤه‌به‌رێ ناحیا كانی ماسێ بۆ رۆژناما ئه‌ڤرۆ دیار كر، ژ ئه‌گه‌رێ شه‌ڕێ د ناڤبه‌را په‌كه‌كێ و سۆپایێ توركیا دا ل سنوورێ ناحیا كانی ماسێ رووداین، هه‌تا نوكه 220 خێزان ل ناحیا كانی ماسێ یا سه‌ر ب قه‌زا ئامێدیێ ڤه ئاواره بووینه، وان خێزانان قه‌ستا باژێرێن دهۆكێ و زاخۆ و چه‌ندین جهێن دیتر كرینه و هنده‌ك خێزان ژی چووینه هنده‌ك گوندێن ناحیا كانی ماسێ و ل وان گوندان ئاكنجی بووینه، هه‌روه‌سا هه‌ر ژ ده‌مێ هاتنا هێرشا سۆپایێ توركیا بۆ سه‌ر گه‌ریلایێن په‌كه‌كێ ل سنوورێ ناحیا كانی ماسێ هه‌ر پێنج گوندێن كێسته و چه‌لكا نه‌سارا و ئه‌دنێ و سه‌ره‌رۆ و دێشێشێ ل سنوورێ وێ ناحیێ هاتینه چۆلكرن، د هه‌مان ده‌م دا زیانێن مه‌زن گه‌هشتینه خه‌لكێ وان گوندان، دیسا ئاقارێن گوندێن قۆمریێ و هرۆرێ و چه‌لكا موسولمانا و چه‌لكا نه‌سارا و كێسته و ئۆره و دێشێشێ و گه‌له‌ك زه‌ڤی و ره‌زێن وان ب ته‌مامی هشك بووینه و نوكه ژی نه‌شێن بچنه د ناڤ زه‌ڤی و مولكێن خوه دا.
ناڤهاتی گۆت: “ژ ئه‌نجامێ شه‌ڕ و ئالۆزیێن د ناڤبه‌را په‌كه‌كێ و سۆپایێ توركیا دا، هه‌تا نوكه پتری 22 هزار و 600 دۆنه‌مێن دارستانێ و زه‌ڤیێن چاندنێ هاتینه سۆتن، ب گوژمێ پتری حه‌فت ملیار دیناران زیان گه‌هشتیه خه‌لكێ وان گوندان، د هه‌مان ده‌م دا پتر ژ 26 جاران كاره‌با گوندێن ئه‌دنێ و سه‌ره‌رۆ و ئۆره ژ ئالیێ تۆپخانێن سۆپایێ توركیا ڤه هاتیه بڕین، هه‌موو جاران تیمێن سه‌خبێریا كاره‌با كانی ماسێ كاره‌با وان گوندان سه‌خبێركریه و گیانێ خوه خستیه د مه‌ترسیێ دا”.
گۆتژی: “هه‌تا نوكه ژ ئه‌نجامێ شه‌ڕێ په‌كه‌كێ و سۆپایێ توركیا دو وه‌لاتی ل ڤێ ده‌ڤه‌رێ شه‌هید بووینه و 11 وه‌لاتی ژی بریندار بووینه، د هه‌مان ده‌م دا زیانه‌كا مه‌زن گه‌هشتیه كه‌رتێ گه‌شتیاری ل سنوورێ ناحیا كانی ماسێ و خه‌لك نه‌شێن بچنه سه‌ر گوندێن خوه، هه‌روه‌سا هێلا كاره‌بێ بۆ جارا ئێكێ گه‌هشته گوندێ شَیلازا كو ب تنێ ئه‌و گوند مابوو هێلا گشتی یا كاره‌بێ نه‌گه‌هشتیێ، د نوكه دا هه‌موو ئه‌و گوندێن خه‌لك لێ دژین، هێلا كاره‌بێ بۆ هاتیه راكێشان”.
