23 ئەلبۆم ژ بەرهەمێن كلاسیك و فۆلكلۆری ل بەر چاپێ نە
ئەڤرۆ
سالار محەمەد دۆسكی:
رێڤەبەرا ئەنستیووتا كەلەپورێ كوردی ل پارێزگەها دهۆكێ دیاركر كو هەتا نوكە (77) ئەلبۆم چاپكرینە ژ بەرهەمێن كلاسیك و سترانێن فلكلۆری یێن مللی و نوكە ژی (23) ئەلبۆم ل بەر چاپێنە ژ هەر چوار پارچێن كوردستانێ و (270) پەرتووك ژی چایكرینە ل گەل (20) پەرتووكێن دیتر ل بەر چاپێنە.
بوهار عەلی حاجی، رێڤەبەرا ئەنستیووتا كەلەپورێ كوردی ل پارێزگەها دهۆكێ بۆ رۆژناما ئەڤرۆ گۆت: ئەم مللەتێ كوردی ڕەهـ و ڕیشالێن مە ل سەر ئەڤێ ئاخێ كو ناڤێ وێ كوردستانە، ئەم كورد مللەتەكین خۆدان ناسناما كەلتوورینە مللەتەكین بەردەوام هەرەشا ژناڤ چوونێ ل سەر مە هەبوویە بەلێ ئەم ژناڤ نەچووین نهێنیا مانا مە ژی كەلتوورێ مە یە ل ناڤ كەلتووری ژی زمانە، هەر زمان ژی بخۆ ڤەدگەریتەڤە بنەكوكا خۆ كو (ستران و چیرۆك و ئەفسانە و فۆرمێت مۆزیكا كوردینە) كو پەیامێن جوداجودانە وەكی نشتیمان پەروەری، ئەڤینی، جوانیا كوردستانێ و هەمی جەنگ و ڕوویدان و كارەساتێن كەڤن ب شێوازێ زارەكی بۆ مە هاتینە ڤەگوهاستن بۆ سەر دەمێ نوكە، ژبۆ كاركرن ل سەر كەلتوورێ زارەكی، سێ قۆناغێن گرنگ هەنە ئەو ژی (كۆمكرن، پاراستن “ئەرشیڤكرن” و گەشەپێدان) مەرەم ژ كۆمكرنێ دەستپێدكەت ژ تۆماركرنا هەمی ئەو فۆرمێن جودا مۆزیك و ستران و چیرۆك كو دناڤ خەلكیدا هێژ ل سەر زارن یان ب ڕێكا بەكەرە و قاوان و كاسێتان ل مالان یان تۆمارگەهان و ڕادیۆیان هاتینە پاراستن.
ناڤبریێ هێشتا گۆت: د دوویڤدا پاراستنا وان ب ڕێكا دیجیتالكرنێ كو ل سەر هارد و سیدیان دهێنە ئەرشیڤكرن و ل گەل تێكستێن وان دهێنە پاراستن و دبنە بەرهەم بێگومان ئەڤ بەرهەمە دبنە ژێدەرێن گەلەك گرنگ بۆ كارێ ڤەكۆلینێن زانستی د قۆناغێن دوویڤدا. پەرەپێدان و كاركرن ل سەر ناسناما كەلتووری بۆ مفاوەرگرتن ژ هەمی بەرهەمێن ئەنستیتویێ ب مەرەما ڤەكۆلینێن زانستی، ئەڤ ئەركە ژی بۆ ناڤەندێن ئەكادیمی و زانكۆیان دزڤریت، دەنگبێژێن كورد مەزنترین ئەرشیڤ بۆ مە هێلایە ئەڤ ئەرشیڤە بەحس ل كەلتوورێ مللەتێ كورد دكەت.
هێشتا گۆت: دەنگبێژی دەرگەهەكە بۆ تێگەهشتن ل ناسناما مللەتێ كورد، هەر ژ زمان و ئاین و بیروباوەر و داب و نەریت و شاهی و خۆشیان و پەیوەندیێن كۆمەلایەتی و سرۆشتێ كوردستانێ ژلایێ دنگبێژان ڤە هاتینە پاراستن و ب دەهان دەنگبێژ مە هەنە كو هەلگرێن پەیامێن نشتیمان پەروەری و مێژووی بوون، وەك نموونە: (كاویس ئاغا) ئێكە ژ ئەوان دەنگبێژان ئەنستیتویا كەلەپوورێ كوردی ئەلبۆما وی چاپكریە، هەروەسا نها پەرتووكا (كاویس ئاغا) كو ب هەر دو دیالێكتێن كرمانجییا سەری و خوارێ پێكدهێت. ئەڤ بەرهەمە ل بەر چاپێیە، هەمی سترانێن وی پەیامێن مێژووی و نشتیمان پەروەرینە.
گۆتژی: دەنگبێژی د مێژوویا دێرینا كوردان دا هەتا نوكە بەشەكە ژ ئەدەبیاتێ زارەكی دناڤ كورداندا هەبوویە مێژووناسێ ئەرمەنی (chorine moses van) د پەرتووكا خۆ دا ئەوا ب ناڤێ (مێژوویا دێرینا ئەرمەنستان) بەحس ل چیرۆكا پاشایێ (ئەژدەهاك) و دەولەتا میدییا دكەت دبێژیت شەڤەكێ پاشا شەڤبێریەكێ ڕێك د ئێخیت هەمی دەنگبێژان گازی دكەت كو سترانا بێژن ژنیشكەكێ ڤە مەترسیەك ل سەر پاشی دروست دبیت ژلایێ دۆژمنێن پاشایی ڤە دەنگبێژ هەر وێگاڤێ پەیامێ دگەهینتە پاشای دناڤ سترانا خۆدا ئەڤەژی وێ چەندێ دگەهینیت كو دەنگبێژی ڤەگوهاستنا پەیامێیە. مێژوویا وێ ڤەدگەریت بۆ سەردەمێ (مادكان) و چێدبیت بەری مادكان ژی هەبیت ژبەر هندێ ناڤەرۆكا سترانێن دەنگبێژان و فۆرمێن وێ ڕاستەوخۆ گرێدایی كۆمەلگەها كوردینە بابەتێن وان هەر چ بیت كاریگەری ل سەر كۆمەلگەهێ دروستكریە.
د ئەڤی باریدا (عەبدلرەحمان گوم كوم) دبێژیت: (سترانا فلكلۆری بناغێ ئەدەبیاتێ زارەكییە ئەدەبێ زارەكیێ كوردی هەر ل سەر ئاخا كوردان دروست بوویە و بەلاڤبوویە). سترانێن كلاسیكیێن كوردی زێدەتر ل سەر ڕوویدانێن ڕاستەقینە هاتینە گوتن.
ل دووماهیێ گۆتژی: كارێ مە وەك ئەنستیتویا كەلەپوورێ كوردی، مە (77) ئەلبۆم چاپكرینە ژ بەرهەمێن كلاسیك و سترانێن فلكلۆری یێن مللی و نوكە ژی (23) ئەلبۆم ل بەر چاپێنە ژ هەر چوار پارچێن كوردستانێ (حەسەن عەلی خەنجەر، ئارام دیكران و فاتما عیسا)، هەروەسا (270) پەرتووك ژی چایكرینە ل گەل (20) پەرتووكێن دیتر ل بەر چاپێنە.
