23 مایکرۆچیڕۆک
شەمال ئاکرەیی
(1) خەوارزمی
پارچەیەکا مۆزیکێ ب ژیرییا دەستکر دانا، هەر کەسێ گوهداری لێکربا، دا هەست و نەستێن خۆ ژ دەست دەت و دا د خەوارزمییان دا نقۆ بیت.
(2) ئەنتیڤایرۆس
د تەلارەکا مگرتی دا میرزایەکێ پرۆگرامکری دژییا. ل شەڤەکێ ڤایرۆسەکی هار هێرش برە سەر و پرۆگرامێ میرزای تێکدا؛ چونکی تەلار یا بێ ئەنتیڤایرۆس بوو!
(3) ویستگەهـ
ل هەر ویستگەهەکا ژیانێ، شەمەندەفڕەک ل بەر مە ڕا دبۆریت.. ب تنێ ئەو کەسێن راستییا خۆ ژ دەست داین، لێ سوار دبن؛ چونکی د هەر فارگۆنەکی دا، هۆڤەکێ تێدا مە ژ دوهییا مە دترسینیت.
(4) کراسگوهۆڕین
ل باژێڕێ کراسگوهۆڕینێ، هندەک سیبەرێن بێ جەستە پەیدا بوون. خەلکی دگۆت: ئەڤە ئەو روحێن بەرێ نە، هێشتا کۆدێن وان نەهاتینە ڤەکرن!
(5) پاشکەفتن
دەمژمێرەکا راگرتنا دەمی ل گەل باهۆزەکا تۆزێ ژ بیابانێ هات. مە بکارئینا و دەم راوەستاند. ژ نشکاڤە، پاترییا دەمژمێڕێ مر! مە گەلەک بزاڤکرن داکو دەمژمێر کاربکەتەڤە و بەردەوامیێ ب دەتە لڤینا دەمی، بەلێ ل جهێ خۆ پاشکەفتی ما!
(6) تابلۆ
نیگارکێشەکی هەر تەبلۆیەکا چێکربا، د بوو راستی. جارەکێ دەرگەهەک ژ بۆ رەڤینێ نیگار کر. چوو تێدا و خۆ د تابلۆیەکا دی دا دیت، ئیمزا و ناڤێ وی ل سەربوون!
(7) درەو
هەر درەوەکا کربا دا برینەک ل سەر لەشێ وی پەیدا بیت. ئەڤرۆ لەشێ وی مینا لەشێ جەنگاوەرەکێ تژی برینە، بێی کو وی ئێک شەڕ ژی کربیت!
(8) دارا هیڤییان
دارەکا هیڤییان چاند، بەلێ بەرۆڤاژی شین بوو… رەهێن وێ بەر ب ئەسمانی ڤە بلند بوون و تاکێن وێ کو هیڤیێن وی پێڤەهاتبوون، د ئەردی دا چوونە خوار.
(9) مرۆڤ
رۆژ ژ هەلاتنا خۆ غەییدی، ستێرناسان گۆت: ئەم یێن دهێینە سزادان، ژ بەر کو مە گەلەک گرنگی دا ئەسمانی و مە مرۆڤ ژ بیر کر!
(10) دل
دلەکێ نوو ژ بازارێ رەش بۆ خۆ کڕی. هەر دەما کەفتبا د ئەڤینییەکی دا، دترسییا خودانێ بەرێ یێ دلی، ئەڤینا وی ژێ بستینیت!
(11) خەونێن رەنگین
ل بازاڕێ کەڤن، پیرەمێرەکی خەونێن رەنگین د شووشەیێن بچووک دا دفرۆتن. من خەونەکا شین کڕی، دەما من ل مال ئەو شووشە ڤەکری، ژۆرا من ژ بەلاتینکان تژی بوو. من زانی ئەو خەونا زارۆیەکی بوو بەری مەزن ببیت مر بوو!
(12) دەرمانخەنەیا پەیڤان
دەرمانخانەیەکێ، پەیڤ ل باتی دەرمانان دفرۆتن. (حەز ژ تە دکەم) ب سەد دۆلاران، (ببۆرە) ب پێنجی دۆلاران. من، (ب خاترا تە) ب هەر تشتێ من هەیی کڕی. دەما من ب لێڤکری، د دەڤی من دا بوو (ل گەل من بمینە)!
(13) دەمژمێرا سۆزێ
دەمژمێرا باپیرێ من، دەمی ناهەژمێریت، بەلکو هەستان دپیڤیت. دەما دبێژم ئەز حەز ژ تە دکەم، میلێن وێ ب لەز دلڤن. دەما دبێژم دێ من هێلی؟ رادوەستن. ژ چوونا تە وەرە، میلێن دەمژمێرێ ل سەر 2:30ێ ئەڤینا مە یا هەتا هەتایی راوەستییانە!
(14) فرۆشکارا ماچان
ل بازاڕێ شەڤێ، پیرەژنەک ماچان د سندۆقێن بچووک دا دفرۆشیت. ماچا دایکەکێ بۆ زارۆکێ خۆ، ماچا مالئاڤاهییا پێشمەرگەیەکی… . من ماچا ئەڤینا ئێکێ کڕی، دەما من بکارئینای، من تاما رۆندکێن سویر کر!
(15) نەزان
چو جاران د رۆژا خۆ دا نە دژییا، یان دا د هەمبێزا زارۆکینی و سنێلەیی و گەنجاتییا خۆ دا بیت و ئاخینکان بۆ راهێلیت؛ یان دا ب خەیال فڕیت و هیڤییان بۆ سوبەهی خوازیت.
(16) ناڤ
هندی د ژیانێ دا بوو، کەڤالێن نموونە نیگار دکرن، لێ کەسێ های ژێ نەبوو! مر.. بوو ناڤ!
(17) زارۆک
ب خۆدانکرنا هەر چار زارۆکێن خۆ گەلەک ماندی بوو. ژیانا وێ بەر ب دووماهیێ چوو، بەرهەمێ پەروەردەیا خۆ نە دیت؛ چونکی نها، هەر چار زارۆکێن وێ ل دەرڤەی وەلاتینە و ئەو ژی یا ل مالا دانعەمران.
(18) داهێنان
داهێنانەک دروستکر، داکو هزرێن خۆ پێ زەنگین بکەت. لێ داهێنانا وی بەروڤاژی لێ زڤڕی و سەرێ وی ژ هزران ڤالاکر.
(19) پەنگاندن
هزرێن خۆ د سندۆقا سەرێ خۆ دا دپەنگاندن، سندۆق شکەست و هزر بوونە بەلاتینک و فڕین و خۆ د ئاگرێ داب و نەریتان دا وەرکر.
(20) دەلیڤە
هەر ل هیڤییا دەلیڤەیەکێ ما، لێ چێنەبوو. ل دووماهیێ زانی کو شیانا دەستێن وی ب خۆ دەلیڤەیە، لێ وی نە دزانی بکاربینیت!
(21) ئاسێبوون
دا نامەیکێ بۆ (وێ) نڤیسیت، بەلێ ئەو نامە د گەورییا وێرەکیێ دا ئاسێ ما!
(22) چرکە
زارۆیەکی ژ پیرەمێرەکی پرسی: چ جوداهییا تەمەنی د ناڤبەرا مە دا هەیە؟ پیرەمێری بەرسڤدا: «ب تنێ چەند چرکە سالەک!»
(23) بزمار
دەما چەکووچی بزمار د دارێ ڕا قوتای، دارێ هەوار کر: چما من دئێشینی؟ بزمارێ بەرسڤا وێ دا و گۆتێ: نێ تە های ژ من نینە، چەکووچی چو د من نەهێلا، نێ ئەز ژی یێ دئێشم!