240 هزار تەنێن بەرهەمێ خۆمالی بۆ ئیراقێ هاتینە رەوانەكرن
هەرهین محەمەد:
جێگرێ رێڤەبەرێ گشتی یێ چاندنێ دیار كر، ل دەستپێكا ڤێ هەیڤێ هاتنا هنارا بیانی بۆ ناڤ بازاری دا هاتیە قەدەغەكرن و مەرەم ژ ڤێ بریارێ ئەوە پتر پویتە ب بەرهەمێن خومالی بهێتە دان و ئەو بەرهەمێن دهاتینە رەوانەكرن ژ بۆ باشور و ناڤەراستا عیراقێ پتری 240 هزار تەنانە ژ هەموو بەرهەمان.
ئەندازیار موسلح حەسەن، جێگرێ رێڤەبەرێ گشتی یێ رێڤەبەریا گشتی یا چاندنێ ل دهۆكێ گۆت: هەر نیڤا هەیڤا هەشت هەتا نیڤا هەیڤا 12 بەرهەمێ خۆمالی دهێتە د ناڤ بازاری دا و سالانە ل دووڤ روزناما چاندنێ گومرك و باچ ل سەر ڤی بەرهەمی دهێتە دانان، دا كو ئەو بەرهەمێن ژ دەرڤە دهێن كارتێكرن ل سەر هەمێ خۆمالی نەبیت، بەلێ وەسا دیارە بەرهەمەكێ مەزن دناڤ بازاری دا هەیە و لژنەیێن مە و ل گەل یێن گومركان سەرەدانا هەموو گومركان كر و دیاربوو بەرهەمەكێ مشە یێ هەی دناڤ بازاری دا و ئەڤە بۆ ئەگەرێ وێ چەندێ بریار ژ وەزارەتا چاندنێ دەركەفت هەر ژ 5/11/2024 ئەو بەرهەمێن ژ دەرڤە بهێن ب ئێك جاری بهێنە قەدەغەكرن.
زێدەتر گۆت: سالانە باج ل سەر بەرهەمێ بیانی دهاتە دانان، بەلێ ئەڤ سالە بەرهەمێ خۆمالی گەلەك یێ مشە بوو، لەورا قەدەغە ل سەر بەرهەمێن بیانی هاتە دان هەتا دەمەكێ نەدیار و كارتێكرنا قەدەغەكرنا بەرهەمێن بیانی ئەوە پاراستنا بەرهەمێن خۆمالی یە و هەكە ئەڤ رێگریە نەبا هنار ب شێوەیەكێ نەدیار دا دبازاری دا ئەرزان بیت، چونكو هندەك دەرگەه دەستێ مەدانین وەك یێن قاجاخی یێن ناڤەراست و باشوری عیراقێ و دەمێ قەدەغە دبن ئەم ناهێلین بهێنە دناڤ بازارێن هەرێمێ دا و یا ژ هەموویێ گرنگتر پاراستنا بەرهەمێ خۆمالی یە نە بارگرانیە ل سەر ملێن وەلاتی، چونكو ئەم یێن بینین بهایێ وان گران نینە دناڤبەرا هزاردیناران بۆ هزارو پێنچ سەددیناران دهێتە فرۆتن، بەلێ هەرگاڤا مە دیت بۆ بارگرانی ل سەر ملێن وەلاتیان لژنەیێن مە سەرەدانا گومركان و جهێن پەیوەندیدار دكەن و بریارێ ددەن قەدەغە ب راوەستیت.
ئەو چەندە ژی گۆت: پتریا بەرهەمیێن مە یێن خۆمالی دچیتە باشورو ناڤەراستا ئیراقێ، چونكو حەزەكا زێدە ل سەر بەرهەمێن چاندنێ هەیە و هنار ژی ژ وان بەرهەمایە دهێتە رەوانەكرن بۆ ناڤەراست و باشورێ عیراقێ و هەكە ئەم سەحكەینێ ئەو بەرهەمێن مە بۆ ئەوان هنارتین پتری 245 هزار تەنانە و ئەڤ رێژەیە هندەك بەرهەمێن دی ژی ب خوە ڤە دگرت و هنار ژی ژ ئەوان بەرهەمایە هاتیە رەوانەكرن، ئانكو هەر رێكەكا هەبیت ژ بۆ رەوانەكرنێ ئەم پەسەندان ددەینە جوتیاران و بەرهەمێن خوە دهنێرنە ناڤەراست و باشورێ عیراقێ و هەر دیسان گەلەك ژ بەرهەمێن مە دچنە دكارگەهان دا وەكو تەماتا سور و پتات و دەمێ هنار دهیچتە رەوانەكرن لنك وان گەلەكا بهایە و گرنگیێ پێدەن و حەزژێدكەن.
