2400 یەكـەیێن ئاكـنجیبوونـێ بۆ خـێزانێن كێم دەرامـەت ل دهـۆكێ دهێنە ئاڤـاكـرن
سندس سالح سلێڤانەیی:
پەیڤدارێ كومەلا كرێنشینێن كوردستانێ دیاركر، ب پشتەڤانیا حكومەتا هەرێما كوردستانێ و دووڤچوونا بەردەواما وەزیرێ باژێرڤانی و گەشتوگوزارێ، كار ل سەر ئاڤاكرنا یەكەیێن ئاكنجیبوونێ بۆ خێزانێن كێم دەرمەات یا بەردەوامە و ل هندەك دەڤەران ب رێژەیا 50% و ل هندەك دەڤەران ژی ب رێژەیا 70% كار بجههاتیە و ل هندەك دەڤەران ژی هێشتا ئەردە.
كارزان رەشید، پەیڤدارێ كومەلا كرێنشینێن كوردستانێ بۆ رۆژناما ئەڤرۆ گۆت: ئاڤاكرنا وان یەكەیان یا بەردەوامە و ل بەرە د دەمێ دو سالان دا ب دووماهی بهێن و خێزانێن كرێنشین كلیلێن خوە وەربگرن، بۆ زانین (203) هزار سەرۆك خێزانان ناسنامەیا كومەلا كرێنشینێن كوردستانێ هەیە و ئەڤە ئەندامن ل دەف مە هاتینە تۆماركرن، لێ هژمارا وان پترە، بۆ نموونە ل هەولێرێ ( 102) هزار هەنە، لێ ب تنێ (25) هزار ل دەف مە د تۆماركرینە و ناسنامەیا كومەلا مە وەرگرتینە، ئانكو مەرج نینە هەموو ل دەف مە هاتبنە تۆماركرن، ل پارێزگەها دهۆكێ ژی (2400) یەكەیێن ئاكنجیبوونێ دهێنە ئاڤاكرن و ب رێژەیا 70% هاتنیە بجه ئینان و یێن مای ژی پارە بۆ هاتیە تەرخانكرن و ئەو ژی دێ هێنە تمامكرن و ئەز ب باوەرم بەری دەمێ بۆ هاتیە دیاركرن دێ ب دووماهی هێن و كرێنشین دێ چن كلیلێن خوە وەرگرن و ژێ مفاداربن، بۆ زانین ل بەر بوو زووتر ب دووماهی هاتبان لێ ژبەر قەیرانا دارایێ چەندەكێ گیرووبوون.
هەروەسا گۆت: مە وەك كومەلا كرێنشینێن كوردستانێ داتایێن باش یێن هژمارا كرێنشینان ل بەر دەست هەنە، هەروەسا پەیوەندیێن باش دگەل وەزارەتا باژێرڤانیان هەنە و بەردەوام سەرەدانا وان دكەین و رەوشا كرێنشینان بۆ بەحس دكەین و بڕیارە ئەوە ئەو خێزانێن رەوشا وان یا ئابووری گەلەك یا لاواز بیت وان یەكەیان وەربگرن، چونكو هندەك كرێنشین هەنە راستە یێ كریان ڤە بەس هەیڤانە داهاتەكێ باش وەك مووچە بۆ دهێت، هەنە ژی كرێدارن بەس كارێ بازرگانیێ دكەن، لەورا ل دووف رێنمایان ئەڤە یەكە دێ بۆ وان خێزانان بن یێن بێ داهات، هەروەسا ئەوێن رەوشا وان یا ئابووری گەلەك گەلەك لاواز بیت، هەروەسا دێ گرنگی ب خودان پێدڤیێن تایبەت ژی دەین.
