27 رۆژە زارۆیەک ل قەزا زاخۆ یێ بێ سەروشوونە
ئەڤرۆ نیوز:
زارۆیەکێ شەش سالی ب ناڤێ ئیبراھیم داخاز، دەمێ 27 رۆژانە یێ بەرزەیە و ھەتا نوکە چو ژێ نەھاتیە زانین، کەسوکارێن وی زارۆیی ژی دیار دکەن کو چ کامیرێن زێرەڤانیێ ب کەمپا چەمشکۆ ڤە نینن کو پشتراست بکەن زارویێ وان چووبیتە دناڤ کەمپێ دا، ھەر ل گۆرەی گۆتنێن وان ل 26 ھەیڤا بۆری وەرە ئەو زارۆ یێ بێ سەروشوونە، پۆلیسێن قەزا زاخۆ ژی دبێژن: ئەڤە حالەتێ ئێکێ یە ل زاخۆ ئەڤ سالە ھەتا نوکە نەھاتبیتە ئاشکراکرن.
ئیبراھیم غەریب، باپیرێ زارۆیێ بەرزەبووی بۆ رۆژناما ئەڤرۆ دیار کر، ل راستا کەمپا چەمشکۆ د کامێرەیەکا چاڤدێریێ یا ئەکادیمیا لەشکەری دا وێنێ نەڤیێ وی دیاربوویە کو دولکەکێ 16 لتری یێ ئاڤێ یێ ڤالا د دەستی دایە و ل دەمژمێر 11:33 خۆلەکی سپێدێ بەر ب کەمپا چەمشکۆ ڤە چوویە، پاشی دو کەسان دانپێدان کرینە کو وان ئەو زارۆیە ل پشت کەمپا ناڤبری دیتیە، لێ پشتی ھینگێ ب چار رۆژان ئە دولکە ھاتیە دیتن، لێ نە دناڤ کەمپێ دا و گۆت: “تیمێن بەرگرییا باژێری و پۆلیس و ئاسایش و پاسەوانێن سنووری بەردەوام لێدگەرن، لێ ھەتا نوکە چ ژێ دیار نەبوویە”.
شەیما عەبدولعەزیز، دایکا زارۆیێ بەرزەبووی ئاشکرا کر، ل گەل خێزانا خوە ژ کۆمەلگەھا بڕدیان ل ناحیا زومار ل سنوورێ ھەرێم و رۆژئاڤایێ کوردستانێ ھاتبوونە مالا خەزیزێ خوە ل تاخێ مەھمەدیکێ و گۆت: “زارۆیێ مە بزاڤکریە ل دەمژمێر 11 سپێدێ قەستا مالا تیێ من بکەت و ل دەمژمێر 12 نیڤرۆ ژ لایێ برایەکێ وی ڤە ھاتینە ئاگەھدارکرن کو د ریکێ دا بەرزەبوویە”.
ھەروەسا داخاز ئیبراھیم، بابێ وی زارۆیی تەکەز کر، زمانێ وی جاران گرانە، لێ ھەستێ گۆھلێبوون و مێشکێ وی د دروستن و چ ئاریشە نینن،و گۆت: “مە گۆمان ل سەر کەسێ نینە، ل رۆژا ئێکێ ھەتا یا سیێ ب شەڤ ب 12 ترۆمبێلان ئەم لێدگەریان و ھەتا چووینە گوندێ دۆرنەخێ یێ سەر ب قەزا زاخۆ ڤە و ل ئالیێ وەلاتێ تورکیا ژی کەسوکارێن مە ل بەر ئاڤان لێدگەریان و ھێشتا ئاشکرا نەبوویە”.
ل دووماھیێ نەھشەت سەلمان، بەرپرسێ ڕاگەھاندنا رێڤەبەریا پۆلیسێن قەزا زاخۆ ئاشکرا کر، ئەو رۆژانە و ب بەردەوامی ل وی زارۆیی دگەریێن و گۆت: “د ئەڤ سالە دا ئەڤە حالەتێ ئێکێ یە ھندە گیرۆ دبیت و ھەتا نوکە نەھاتبیتە ئاشکراکرن”.
