27 سالن وەلاتیەکێ دینارتێ بێ بەرامبەر شتلێن داروباری ددەته وەلاتیان
ئەڤرۆ نیوز ، نەوزاد ھلۆری:
ل سالا 1992 سالەکێ پشتی راپەرینێ ھەتا نھا وەلاتیەکێ ناحیا دینارتێ یا سەر ب قەزا ئاکرێ شتلێن داروباری بێ بەرامبەر لسەر وەلاتی و جوتیارێن سنوورێ ناحیا دینارتێ و دەڤەرێن دن بێ بەرامبەر دابەش دکەت و ئەڤ سالە ژی ھژمارەکا زور دابەشکرینە.
دڤی واری دا بێدار عەبدولقەھار ئەو وەلاتیە بو ئەڤرۆ نیوز گۆت: (ل سالا 1992 بابێ من وەکو ئێک ژ کەساتیێن دەڤەرا دینارتێ شتلێن داروباری ب تایەبتی ژی شتلێن گویزێ بێ بەرامبەر لسەر وەلاتیان دابەشکرن و ھژمارەکا زور یا جوتیار و وەلاتیان مفا ژ ڤێ یەکێ کر ، و پشتی کوب ابێ من وەغەرکری داخواز ل مە کر کو ئەم ژی بەردەوام بین لسەر دابەشکرنا شتلێن داروباری بێ بەرامبەر و ھەتا نھا ژی ئەم ژی بەردەوامین و ھەموو سالان د وەرزێ چاندنێ دا ئەم شتلێن داروباری دابەش دکەین).
زێدەتر گۆت: (ئێک ژ وان شتلێن کو مە لسەر جوتیار و وەلاتیان بەردەوامی دابەشکری ، شتلێن دارا گویزێ بوون ژ جورێ ئوستورالی و دانیمارکی و مەنقودی کو ژ وان دارێن گویزێ نە سالەکێ یان دوو سالان دھێتە بەری و دارەکا بەژن کورتە و وەکو وشیێن تری گویز پێڤە دھێن و گەلەک یا سەرکەفتی یە ل کوردستانێ و جیھانێ ژی و گیزەکا نازکە و تامەکا خوش ھەیە و ئەڤ سالە 600 شتلێن ژ ڤان جوران مە لسەر وەلاتیان و جوتیاران دابەشکرن کو ھەر ئێک ژ وان سەر مە دگەھیتە ھەشت ھزار دیناران).
ناڤبری دیارکر ژی کو ئەو ب رێیا مشتەلەکا دەڤەرێ گویزان وەکو قەلەم چینن و 15% ژ وان شتلان ددەن خودانێ مشتەلێ داکو دبەرامبەر دا 85% ژ وان داران بو وەلاتیان شوون بکەت و گوت ژی: (ھەتا کو ئەم ل ژیانێ ماینە دێ لسەر دابەشکرنا شتلان بەردەوام بین ژبەرکو ئەڤ یەک دخێزانا مەدا بویە کەلتوور و سالانە دووبارە دبیت ، و ھەتا نھا زێدەتر ژ 50 ھزار ستلێن داروباری مە لسەر جوتیار و وەلاتیان بێ بەرامبەر دابەشکرینە).
