28 تێمین ئاگرڤه‌مراندنێ ل دهۆكێ بۆ پاراستنا گه‌نمی هاتنه پێكئینان
دهوك، له‌زگین جوقی:
په‌یڤدارێ رێڤه‌به‌ریا به‌ره‌ڤانیا باژێری ل دهۆكێ دیار كر، ئه‌ڤ ساله بۆ وه‌رزی دروینا ده‌خل و دانێ جۆتیاران و پاراستنا وان ژ سۆتنێ، 28 تیمێن ئاگرڤه‌مراندنێ یێن هاتینه پێكئینان.
بێوار عه‌بدولعه‌زیز، په‌یڤدارێ رێڤه‌به‌ریا به‌ره‌ڤانیا باژێری ل دهۆكێ راگه‌هاند كو ئه‌و جه و ده‌ڤه‌رێن ئه‌ڤ ساله ده‌خل و دانێ جۆتیاران یێ باش بیت و بهێته دروین دێ تێمین به‌ره‌ڤانیا باژێری بۆ كۆنترۆلكرنا روودانێن ئاگربه‌ربوونێ قه‌ستا وان جه و ده‌ڤه‌ران كه‌ن و گۆت: “ل سه‌رانسه‌ری پارێزگه‌ها دهۆكێ ئه‌ڤ ساله 28 تیمێن ئاگرڤه‌مراندنێ ژ لایێ به‌ره‌ڤانیا باژێری ڤه یێن هاتینه پێكئینان”.
گۆتژی: “ئه‌ڤ ساله هێشتا چو روودانێن سۆتنا ده‌خل و دانی ل سنۆرێ پارێزگه‌ها دهۆكێ نه‌هاتینه تۆماركرن، هیڤیدارین هه‌موو جۆتیار و خه‌لك ژی هه‌ڤكار بن ل گه‌ل تیمێن به‌ره‌ڤانیا باژێری، داكو چو روودانێن سۆتنا ده‌خل و دانی روو نه‌ده‌ن”.
