28 جاددەیێن ناڤخوەیی ل ئاكرێ دهێنە قێركرن و كۆنكریتكرن
ئاكرێ، رەمەزان زەكەریا:
د ناڤ سەنتەرێ دەڤەرداریا ئاكرێ دا هەژمارەكا جاددەیێن ناڤخوەیی دهێنە قێركرن و كۆنكریتكرن.
دەڤەرداریا ئاكرێ بەلاڤكریە: د. دلاوەر بۆزو، دەڤەردارێ ئاكرێ ل گەل بلند رزا زبێر، سەرۆكێ باژێرڤانیا ئاكرێ دووڤچوونا هەژمارەكا پڕۆژەیێن چێكرنا جاددەیێن ناڤخوەیی ل گەرەكا گولان كر كو ژ 28 جاددەیان پێك هاتبوون، ئەو جاددەیە نوكە د قووناغێن بجهئینانێ دانە و دهێنە قێركرن و كۆنكریتكرن.
ئاشكرا ژی كریە: هەژمارەكا بەرچاڤا جاددەیێن ناڤخوەیی ل تاخێ 11 ئەیلۆل و رێكا دەواجنێ و رێكێن تاخێ ئالەیێ ل ژێر بجهئینانێ دانە ل سەنتەرێ ئاكرێ، ئەڤ پڕۆژە ب گوژمێ سێ ملیار و 100 ملیۆن دیناران ل سەر بودجا حوكمەتا هەرێما كوردستانێ دهێنە بجهئینان.
دەڤەرداریا ئاكرێ خویا ژی كریە، ب تەمامبوونا ڤان جاددەیان دێ رەنگ و سیمایێ جوانێ باژێرڤانیێ روویەكێ جوان ب خوەڤە گریت و دێ بیتە ئەگەرێ كار ئاسانیا هاتنوچوونا وەلاتیان، حكومەتا هەرێما كوردستانێ بەردەوامە ل سەر بجهئینانا پڕۆژەیێن خزمەتگوزاری د بیاڤێن جودا دا.