30 ساله گاڤان و هه‌موو چێلان دنیاسیت
ئه‌ڤرۆ نیوز ، نه‌وزاد هلۆرى:
محه‌مه‌د ره‌شید وه‌لاتیه‌كێ كومه‌لگه‌ها سیریێ یا سه‌ر ب ناحیا شێلادزێ یه ، ئه‌ڤه 30 ساله وه‌كو گاڤان كاردكه‌ت و ب كه‌سه‌كێ دلسوز و خه‌مخور و ره‌وشت بلند دهێته نیاسین ، ئه‌ڤ دزانیت كیژان چێل یا كێ یه.
محه‌مه‌د ره‌شید ناسیار ب محه‌مه‌دێ گاڤان بۆ ئه‌ڤرۆ نیوز گۆت: (ل سالا 1988 هه‌تا نها ئه‌ز وه‌كو گاڤان دچم به‌ر ئاژه‌لێن خه‌لكى و 11 سالان ل ده‌ڤه‌را بارزان و سالێن دن ژى هه‌موويان ل كومه‌لگه‌ها سیریێ و د‌ڤان سالان دا بێ ڤه‌برین ئه‌ز گاڤان بووم و هه‌تا نها من چو چێل ژى نینن)
زێده‌تر گۆت: (شانازیێ دكه‌م كو د‌ڤان سالان دا زێده‌بارى خزمه‌تكرنا خه‌لكێ ده‌ڤه‌رێ د هه‌مان ده‌م دا خزمه‌تا مالا خوه و زاروكێن خوه دكه‌م و نانه‌كى بۆ وان په‌یدا دكه‌م و شانازیا ژ هه‌موويان مه‌زنتر ئه‌وه كو ژ رۆژا ئه‌ز بوویمه گاڤان هه‌تا نها هێشتا كه‌سه‌كێ چو گازنده ژمن نه‌كرینه و چو كه‌سه‌كێ ژى نه‌گوتیه من ئه‌رێ تو چێلان دبه‌ى كیڤه و ئه‌رێ تو ئاڤ دده‌ى و دچه‌رینى یان نه).
محه‌مه‌دێ گاڤان ل كومه‌لگه‌ها سیریێ دژیت و خودان سێ كور و چار كچه و ب ره‌وشت و دلوڤانى و دلسوزیا خوه دهێته نیاسین، دبێژيت: (ئه‌و گارانه ئه‌ز دچم به‌ر ژ 120 چێلان پێك دهێت و چو جاران ژى من نه‌گۆتیه كه‌سێ كو پارێ خوه بده‌ن، به‌لكو هه‌ر كه‌س ئازاده پارێ خوه بده‌ت یان نه‌ده‌ت، و هه‌ركه‌سێ بده‌ت ژى ئه‌ز ژ 10 هزار دیناران بۆ هه‌ر چێله‌كێ زێده‌تر وه‌رناگرم).
ئێك ژ نهێنێن ناڤبرى ئه‌وه كو هه‌موو چێلان دناسیت و زێده‌بارى دانانا ناڤێن تایبه‌ت بۆ وان چێلان د هه‌مان ده‌م دا دزانیت كیژان چێل یا كێ یه.
ل دۆر ڤێ چه‌ندێ دبێژيت: (ئه‌ز ناهێلم چێل برسى و تێهنى ببن و هه‌ر ده‌ما كێشه‌یه‌ك ل ئاقارى بۆ چێله‌كێ درۆست بیت، ئه‌ز ئێكسه‌ر په‌یوه‌ندیێ ب خودانێ وان دكه‌م ژبه‌ركو دزانم كیژان چێل یا كێ یه و من بو نیاسینا زێده‌تر یا چێلان هنده‌ك ناڤ بۆ وان داناینه بۆ نموونه چاڤ ره‌ش ، چاڤ به‌له‌ك ، ره‌شێ ، زه‌رێ ، بسكێ ، حتێ، شینێ و گه‌له‌ك ناڤێن دن داناینه).
دياركر (رۆژانه ژ ده‌مژمێر 4:00ێ سپێدێ دچمه مه‌یدانكا كومكرنا چێلاو ده‌مژمێر 5:00ێ سپێدێ چێلا دبه‌مه ئاقارى بۆ چه‌راندنێ، ول ده‌مژمێر 10:30ێ دبه‌مه سه‌ر رووبارى بۆ ئاڤدانێ و هه‌تا ده‌مژمێر 2:00ێ پشتى نیڤرۆ دهێلم سه‌ر رووبارى ،ل ده‌مژمێر 2:300 بۆ ده‌مژمێر 5:00ێ ئێڤارى دووباره دبه‌م چه‌روانى ، و پاشان دووباره ئاڤ دده‌م و ده‌مژمێر 6:00ێ ئێڤارى بۆ خه‌لكى دزڤرینم ڤه ، و ژبه‌ركو نها ره‌مه‌زانه ئه‌ز ده‌مژمێره‌كێ به‌رى وه‌ختى چێلان بۆ خودانان دزڤرینم داكو ئه‌و ژى بشێن كاروبارێن خوه بكه‌ن به‌رى ده‌مێ فتارێ).
