30 پێشمەرگـە ل گەل هێزا عەلی هالـۆی دبـێ چەك بـوون
زاخۆ، سالار محەمەد دۆسكی:
3 – 3
پێشمەرگە هاتە گازیكرن وی دەمی دگۆتن فلان تو هندە زەلاما بینە و تو هندا بینە و هەمی بوونە گرۆپەك و ب رێكەفتن و چوونە بەرئاڤێ و نێزیكی (گوندەكی) بوون و دەر دورێن گوندی دورپێچكرن بوو سپێدە و نەهێلان نە كەس ژ گوندی دەركەڤیت و نە كەس بهێـتە دناڤا گوندی دا و هەر كەسەكێ دهاتە گوندی دەستە سەركرن هەتا بوویە مەغرەب و چوونە بەر ئاڤێ و گۆتە پێشمەرگە شیتكێن خوە ڤە كەن و هەر چەند پێشمەرگە خوە ب شیتكەكێ ڤە بكرن چونكە هێزا چەند پێشمەرگان نە وەكی هێزا پێشمەرگەكی یە و دا هوون بشێن ژ ئاڤێ دەربازبن و هەر هەمی پێشمەرگە دەربازبوون و پشتی دەربازبووین شنی گۆتنە پێشمەرگەی ئەم دێ چینە (عین زالە) و هێزا پێشمەرگەی هاتنە بەلاڤەكرن بوونە سێ هێز هێزەك (عیسێ سوار) ئێك (هاشم مێروزی) هێزەك (عەلی هالو) ئەڤ شەرە ب تەمامی بەحس هاتیەكرن و هەر سەركردەك بۆ جهەكی هاتە دەست نیشانكرن و هاڤێنە كومپانیا پەترۆلێ و بنگەهێ پولیسان ب تەمامی هاتنە سوتن و ئاڤاهیێ دەڤەرداریێ هاتە سوتن و نێزیكی (10) ئەندازیارێن ئەمریكی یێن كومپانیا پەترۆلێ دەستەسەركرن و هاتنە (زومار) بەرێ و بنگەهەكێ پولیسان درێكێ دا بوو و ئێك هەبوو دگۆتنێ( ئینس كەچەل) ب ترۆمبێلێن لەشكری ڤە هاتە بەراهی یا پێشمەرگەی و ئێكسەر پێشمەرگە ل بەرامبەر راوستیا و ب ترۆمبێلێن لەشكەری ڤە و ئاگر بەردا بنگەهی و سوتن و هاتنە بەر ئاڤێ و دەربازبوون و دیسا بۆ سپێدە و نەشیان ب لڤن و هەتا بوویە مەغرەب و ئەندازیار ل گەل خوە ئینانە چیایی.
پێشمەرگەیێ شۆرەشێن ئیلۆن و گولانێ (عومەر عەلی هالۆ) گۆتژی: دناڤبەرا سالێن (1961- 1962) پێشمەرگەی كەمینەك دانا گەلیێ زاخو و فەوجەك ب تەمامی ل گەلیێ نەهێلا دەربازبیت و (185) ژ لەشكری ل گەل ئیمامێ فەوجێ دەستەسەركرن و ئەڤە بەری شەرێ (باتیفا) بوو، دیسا شەرێ چیایێ سپی ل سالا 1965 بوو و حوكمەتێ هات و مە هاڤێتێ و پێشمەرگەی شەهید دان و دووڤ دا حوكمەت شكەست ل سەر دەستێ پێشمەرگەی.
پێشمەرگەیێ شۆرەشێن ئیلون و گولانێ (عومەر عەلی هالۆ) ل دور چەكێ پێشمەرگەی ل شۆرەشا ئیلۆنا مەزن گۆت: وی دەمی كێم پێشمەرگەی (برنو) هەبوون، دەمێ فەوجا لەشكرێ ئیراقێ ل گەلیێ زاخو ستاندی ل (حەسەن ئاڤا) ژ كار كەفت و (عیسێ سوار) گۆت كی دێ چیت وێژی ب دووماهی ئینت؟، (عالی هالو) گۆت ئەز دێ چمێ و دەمێ چووینێ دو كلاشینكوف تێدا بوون و ئێك دا (عیسێ) ئێك (عەلی هالو) بخوە هەلگرت وی دەمی مە شنی كلاشینكوف دیتن و كەسەك نەبوو، هندەك ساروخ هەبوون (ئارپیچی) نەبوو (رەشاش برێم) هەبوون، (بیكەسی) نەبوو و ئەڤە چەكێ ئیراقێ دكەتنە دەستێ پێشمەرگەی و هندەك فرۆكە هەبوون مە دگۆتنێ فرۆكێن (قوون كون) .
پێشمەرگەیێ شۆرەشێن ئیلون و گولانێ (عومەر عەلی هالۆ) بەحسێ خارن و ڤەخوارنا پێشمەرگەی كر ل شۆرەشا ئیلۆنا مەزن و گۆت: خوارن و ڤەخوارنا پێشمەرگەی ل سەر خەلكێ گوندان بوو، مووچە هەر سێ چار هەیڤان (5) دیناربوون و هندەك جاران (دەفكێن ریها، تیتن و پەركێن جكارا) بوومە دهاتن، بیرا من دهێت ل سالا 1967 جلكێن (خاكی) بۆ پێشمەرگە هاتن و شەل و شەپ ل بەر پێشمەرگەی بوون، وی دەمی كەسەكێ بۆ مووچەی شەر نەدكر بەلكو بیروباوەر گەلەك بهێز بوون و خەلكی فیشەك ل سەر كیشێن خوە دكرین و دچوونە شەری و دەمێ فەوجا گەلی هاتیە ستاندن هێزا (عەلی هالۆ) هەتا (30) پێشمەرگان چەك نەبوون و پشتی فەوج هاتیە ستاندن چەكەكێ باش كەفتە دەستێ پێشمەرگەی هەر شەرەكێ پێشمەرگەی كربا دەسكەفتی هەبوون و هەتا ل شەرێ چیایێ مەتینی توپ كەفتنە دەستێ پێشمەرگەی و بڤی رەنگی چەك ب دەست پێشمەرگەی دكەفت و بەرەڤانی ژ ئاخا كوردستانێ پێ دكر.
جهێ ئاماژەكرنێ یە كو پێشمەرگەیێ شۆرەشێن ئیلون و گولانێ (عومەر عەلی هالو) ل شۆرەشا گۆلانا پێشكەفتن خواز ژی رۆلەكێ هەرە مەزن و كاریگەر هەبوویە و هەتا سەرهلدانا بوهارا سالا 1991 ژی پشكداری تێدا كریە و بەردەوامی دایە خەباتا پێشمەرگاتیێ و هەتا شەرێ دژی تیرۆرستێن داعس و هەتا ئەڤرۆ ژ خەبات و بەرخودانێ نە ڤەقەتیایە.
