30 پێشمەرگـە ل گەل هێزا عەلی هالـۆ دبـێ چەك بـوون
زاخۆ، سالار محەمەد دۆسكی:
2 – 3
حوكمەتێ گازی كرە ئەوا سەرۆك جاشا و گۆتێ كی دێ ئالایێ ئیراقێ ل سەر (گابنێرکێ) دانیت و دو (گابنێركێ) هەنە یا بچیك و مەزن و كەسەكی گۆتێ دێ ئەز ئالایی چكلینم و ژ (37) جاشا ل گەل بوون و ژ (37) جاشا بتنێ حەفت مان و ئەڤێن دی هەمی هاتنە كوشتنێ و هەمان دەم (عەلی هالو) ب هویری تەماشەی روودانێن شەری دكرن و هەلبەت هەر پلانەكا (عەلی هالو) دانا با 100% ئەو پلان یا سەركەفتی بوو،
پێشمەرگەیێ شۆرەشێن ئیلون و گولانێ (عومەر عەلی هالو)، بەردەوامی دا گۆتنێن خوە و زێدەتر بەحسێ شەرێ چیایێ مەتنی كر و گۆت: (عیسێ سوار) گازی (عەلی هالو) كر و گۆتێ كورێ من (محەمەد) شەهید بوویە و ئەڤە جەبهە ب هیڤیا تەڤە و پێشمەرگە ل گەل تە نە و دەستهەلات هەمی تە هەنە یا باش وێ بكە و (عەلی هالو) زڤری و گۆتێ تو فەرمانێ بدە و ئەم دێ جێبەجێ كەین، (عیسێ سوار) گۆتێ فەرمان و جێبەجێكرن هەر دو یێن تەنە، ئێكی دگۆتنێ (جانگیرێ سێڤو) مرۆڤێ مە بوو، بابێ من گۆتە (جانگیر) هەرە چەپەرێن پێشمەرگان بلا بتنێ ئێك دو پێشمەرگە بمینن و ئەڤێن دی بوومن كوم بكە و هەر هەمی پێشمەرگە هاتنە كومكرن و (عەلی هالو) چوو سەر بەرەكی و گۆت: گەلی برا مە هیڤی ژ خودی دخواستن كو دەبابێن لەشرێ ئیراقێ ژ دووف مە ڤەبن و نوكە ئەگەر ئەم هەر ب رەڤین و دوژمن ب دووڤ مە ڤەبیت دێ چینە سەر سنورێن توركیا و ئەڤە وەلاتەكە چ دلوڤانیێ ب مە نابەت وبڤێ رێكێ دێ دەڤەرا بەواری یا ژ دەست مە چیت و دێ رێك دناڤبەرا مە و (ملا مستەفا بارزانی ) دا هێتە پچاندن، یێ بەرهەڤم خوە بكەمە قوربانی ڤی مللەتی و هەر كەسەكێ ل گەل من خوە نەڤێت بلا دەركەڤیت و پشتی ڤێ گوتارا (عەلی هالو) (19) پێشمەرگە ل گەل دەركەفتن و دیسا گازی كر چ پێشمەرگە ناهێن، ئینا (عەلی هالو) گۆتە پێشمەرگێن مای داخازێ ژ هەوە دكەم پیچەك بەرگێریێ ل گەل حوكمەتێ بكەن و من پلانەك هەیە بەلكی خودێ هاریكاربیت پلانا من سەر بگریت، گازی كرە هەر (20) پێشمەرگان و گۆتێ دێ چینە سەر خالا دیاركری كو گوندێ(ئاسهێ) بوو ل دەڤەرا بەرواری یا و پێشمەرگە بەلاڤەكرن ل سەر رەبیان و هەر (20) پێشمەرگان هاڤێتنە چار رەبیان و ئێكسەر گۆت هێرشە و چەتە ئەوان رەبیان دا بوو و ئەو ئەو هزر نەدكر كو دێ پێشمەرگە بڤی رەنگی و ڤی جهی هێرشێ كەت و ل گەل هێرشا پێشمەرگەی ل هەر چار رەبیان هەی رەبی ب ئێك هێرش ب دەستێن ئەوان پێشمەرگان هاتنە شكاندن و ل گەل شكەستنێ فەوجێ دەست ب باركرنێ كر و ئەوێن سەری هاتنە خوارێ و گەلەك ژ لەشكری كەفتنە دەستی و پێشمەرگە هاتن و گەهشتینە سەرێ چیایێ مەتینی و رەبیەك ل سەرێ چیایێ مەتینی ئاستێ بوو و ئێكی دگۆتنێ (سالحێ سوفی) خودێ ژێ رازی (عەلی هالو) گازیكرێ (سالح) نارنجوكەكێ ب هاڤێژێ و ئەو ژی ئێكسەر بەردا و ب هێزا خودێ هەر ئەو (20) پێشمەرگە ژی بریندار نەبوو و هەر هەمی ب سلامەت بوون، ب چوونا من ئەڤە ژ بەر وێ چەندێ بوویە كو بیروباوەرێن وی دەمی بهێزبوون، پشتی ڤێ چەندێ (عەلی هالو) گۆتە پێشمەرگە خوە ڤەشێرن چونكە دێ حوكمەت ئێدی توپا ل مە گرێدەت، شەرێ مەیتنی (43) رۆژا ڤە كێشا دووڤ دا (عیسێ سوار) هاتە سەرێ چیایی و گۆتێ (عەلی هالو) ئەڤە چ بوو تە كری، وی گۆتێ مە پلانەك هەبوو و خودێ هاریكاربوو و ب هێزا خودێ و پێشمەرگەی ئە شیاین ب سەركەڤین و (عیسێ سوار) گۆتێ عەلی دڤێت خەلاتێ هەوە و پێشمەرگەی ژ (ملا مستەفا بارزانی) داخاز بكەم ، (عەلی هالو) كرە كەنی و گۆتێ خەلاتێ مەزن بوومن ئەوە من دەڤەرا بەرواری یا ژ دەستێن دوژمنی رزگاركر.
پێشمەرگەیێ شۆرەشێن ئیلون و گولانێ (عومەر عەلی هالو) د دیدارا خوە دا بەحسێ شەرێ (عن زالە) كر و گۆت: دناڤبەرا سالێن (1962- 1963) پێشمەرگە چوو (عن زالە) و (علی هالو) سەركردێ لەشكری بوو و دو پولیس هەر دو بناڤێ (قادر) هاتن خوە رادەستی (عەلی هالو)كرن، (قادر مەزن و قادرێ بچیك) هاتنە دەف (عەلی هالو) و گۆتنێ ئەگەر هوون ب هاڤێژنە (عن زالە) ئەمە دێ رێبەریێ بۆ هەوە كەین و دێ رێكا نیشا هەوە دەین وەك بنگەهێ پولیسان و كومپانیا پەترۆلێ و هەر جهەكێ گرنگ ل دەڤەرێ ئەم دێ نیشا هەوە دەین، بابەت (عەلی هالو) بۆ (عیسێ سوار) شرۆڤەكر وی دەمی پێشمەرگە گەلەكێ زێدە نەبوو.
