34 كه‌ڤال د پێشانگه‌ها وێ یا دویێ دا هاتنه نیشادان
دهۆك، هه‌رهین محه‌مه‌د:
ب چاڤدێریا (ئه‌میر عه‌لی) رێڤه‌به‌رێ گشتی یا ره‌وشه‌نبیری و هونه‌ری ل دهۆكێ، ب هه‌ڤكاری ل گه‌ل رێڤه‌به‌ریا هونه‌رێ شێوه‌كاری، دوهی ئێڤاری 25\10\2021 پێشانگه‌هه‌كا تایبه‌ت بۆ هونه‌رمه‌ندا شێوه‌كار(لانا عه‌بدولره‌حمان حاجی) ل هولا گه‌ریا دهۆكێ هاته ڤه‌كرن.
ناڤهاتیێ، بۆ ئه‌ڤرۆ گۆت: ئه‌ڤه پێشانگه‌ها من یا دویێ یا تایبه‌ته و (34) كه‌ڤال هاتینه نیشادان و هه‌ر ئێك ب ده‌مه‌كی ڤه یێ گرێدایه، ب تایبه‌ت ب ڤان كاودانێن نوكه و گه‌نجێن مه قه‌ستا ده‌رڤه‌ی وه‌لاتی دكه‌ن و نه یا ب ساناهیی یه هه‌تا كو مرۆڤ پێشانگه‌هه‌كا تایبه‌ت ڤه‌كه‌ت و گه‌له‌ك یا پێدڤیه بابێ مرۆڤی پشته‌ڤانێ مرۆڤی بیت، هه‌روه‌سا هونه‌رمه‌ندێن كچ ژی پشه‌ته‌ڤانیا مرۆڤی بكه‌ن ژلایێ مه‌عنه‌وی ڤه و به‌ری سێ سالان من حه‌ز هه‌بوو پێشانگه‌هێن تایبه‌ت ڤه‌كه‌م، به‌لێ ده‌لیڤه نه دهات و هه‌كه كه‌ڤال گه‌له‌كێ مه‌زن بیت چار رۆژان ل سه‌ر كار دكه‌م، به‌لێ پتریا جاران ب سێ رۆژان كه‌ڤاله‌كی ب دووماهی دئینم، و د پێشانگه‌هێ دا هه‌كه داخوازی ل سه‌ر كڕینا كه‌ڤالان هه‌بوو دێ فرۆشم، بۆ زانین مالا من و ماموستا میاده‌یێ گه‌له‌ك هاریكاریا من كرینه كو پێشانگه‌هان ڤه‌كه‌م.
