36 ساله چا نه ڤه‌خواری
دهۆك، شاكر ئه‌تروشی:
عابد حاجی عه‌لی، كه‌سه‌كێ خه‌لكێ دهۆكێ یه، ب (عابد به‌ندی) یێ به‌رنیاسه، ل سالا 1970 ل گوندێ به‌ندا سه‌ر ب ده‌ڤه‌را دۆسكیان ڤه ژدایكبوویه، هه‌تا ژیێ پازده سالیێ چاڤه‌خۆره‌كێ عه‌جێب بوو، و ب گۆتنا وی رۆژانه هه‌تا حه‌فت په‌رداخێن چایێ وی ڤه‌دخوارن، لێ ل سالا 1986 ل ناڤ ره‌زی ل گه‌ل كۆرمه‌تێ خوه (فۆئادی) هه‌ردوكا پێكڤه بڕیاردان ئێدی چایێ نه‌ڤه‌خۆن و ئه‌ڤه (36) بۆرین هێشتا فره‌كا چایێ نه‌چوویه ده‌ڤێ وان.
عابد، كو كارێ وی پێشمه‌رگه‌یه بۆ ئه‌ڤرۆ دبێژیت: هه‌تا ژیێ پازده سالیێ من چا ڤه‌دخوار، لێ پشتی من زانی یا ب زیانه ژبه‌ر شه‌كرێ، بێی كو ئه‌ز سویند بخۆم من بڕیاردا ژ چایێ دوور كه‌ڤم و ئه‌ڤه (36) ساله فره‌كا چایێ نێزیكی ده‌ڤێ من نه‌بوویه و ئێدی ئه‌ز یێ فێربوویم هه‌تا ل گه‌ل خوارنا تێشتی ژی ناڤه‌خۆم و چو جاران من ل به‌ر نینه لێ بزڤڕم، ئانكو هه‌تا دووماهیا چركه‌یا ژیانا خوه چایێ ناڤه‌خۆم.
ل دووماهیێ گۆت: هه‌كه ئیرادا مرۆڤی یا بهێز بیت هێلانا هه‌ر تشته‌كی، ب تایبه‌ت ئه‌وێن زیانێ دگه‌هینه ساخله‌میا مرۆڤی گه‌له‌كا ب ساناهی یه، له‌ورا هیڤیا من ئه‌وه گه‌له‌ك كه‌سێن دی ژی چاڤ ل مه بكه‌ن.
