39 سالیا وەغەركرنا شەهید (ئدریس بارزانی) ژلایێ ناڤەندا خانی ڤە هاتە ساخكرن
سندس سالح سلێڤانەیی:
ب هەلكەفتا بۆرینا (39) سالان ل سەر وەغەركرنا شەهید (ئدریس بارزانی) ناڤەندا خانی یا رەوشەنبیری و راگەهاندنێ/ پشكا رەوشەنبیری، دوهی ئێڤاری 31/1 سمینارەك ل دۆر ژیاننامەیا ئدریسێ جانەمەرگ، بۆ بەرێز(ئیحسان ئامێدی) بەرپرسێ ناڤەندێ ل هولا سەنتەرێ پێشمەرگە سازكر.
ل دەستپێكێ فلمەكێ دكیۆمەنتاری ل دۆر ژیان و خەباتا شەهید ئدریس بارزانی كو ژلایێ كەنالێ دهۆك تیڤی ڤە هاتبوو ئامادەكرن هاتە پێشكێشكرن.
د بڕگەیا دویێ دا بەرێز (ئیحسان ئامێدی) بەرپرسێ ناڤەندا خانی یا رەوشەنبیری و راگەهاندنێ، ل دەستپێكا سمینارا خۆ گۆت: شەهید (ئدریس بارزانی) ژ دایكبوویێ سالا (1944) بوو، دژیەكێ بچووكدا هاتیە دناڤ رێزێن پارتی دیمۆكراتی كوردستان دا و ژ بەر زیرەكی و لێهاتنا وی د ژیێ (20) سالیێ دا بوویە بەرپرسێ كارگێڕی و سیاسی ل بارەگایێ بارزانی و هەتا رۆژا وەغەركرنا وی ل 31/1/ 1987 گەلەك پلە و پوستە دناڤ رێزێن پارتی دا وەرگرتینە و هەردەم جهێ باوەریا بارزانیێ نەمر و سەرۆك (مەسعود بارزانی) و مەكتەبا سیاسی و سەركردایەتیا پارتی بوویە، لەورا ژ دەستدانا وی زیانەكا مەزن گەهاندە پارتی و بزاڤا رزگاریخوازا كوردستانێ.
د بڕگەیا دووماهیێ ژی دا ئەنجامێن بەریكانەیا رەوشەنبیری ئەوا بۆ مەدیاكارێن سەر ب سازیێن ناڤەندێ ڤە هاتیە رێكخستن هاتنە راگەهاندن و بەرێز (ئیسماعیل بادی) بەپرسێ پشكا رەوشەنبیری ل ناڤەندا خانی یا رەوشەنبیری و راگەهاندنێ دپەیڤەكێ دا دیاركر كو (45) كەسان پشكداری دوێ بەریكانەیێ دا كربوون و (12) ژوان هاتنە خەلاتكرن، كو چار ژوان ژ رۆژنامەیا ئەڤرۆ بوون، ئەو ژی (رەمەزان زەكەریا، شەهلا رێكانی، نیوار محەمەد سەلیم، دلڤین رەشید) بوون.
