40 سالن كارێ دروارێ دكه‌ت
خانكێ، دلڤین ره‌شید:
ئه‌حمه‌د عه‌ڤدال، وه‌لاتیه‌كێ خه‌لكێ كومه‌لگه‌ها شاریایه، پتری چل سالانه كارێ درۆارێ دكه‌ت و ب گۆتنا وی ئه‌و گه‌له‌ك حه‌ز ژ كارێ خوه دكه‌ت و هندی بشێت درۆارێ بكه‌ت ئه‌و دێ یێ به‌رده‌وام بیت.
ناڤبری بۆ ئه‌ڤرۆ دبێژیت: ل سالا 1979 بۆ جارا ئێكێ وه‌ك كرێكار من ل درینگه‌هه‌كێ كاردكر، پاشان ئه‌ز هاتمه دهۆكێ و بۆ ده‌مه‌كی من ل به‌رده‌ستێ ئێكێ دی كاركر، ژبه‌ر حه‌زا من بۆ كارێ دروینێ ئه‌ز زوو فێربووم، له‌ورا ل سالا 1982 من بۆخوه مه‌كینه‌ك كری و ئێدی بۆخوه كاركر و هه‌تا نوكه یێ به‌رده‌وامم، بۆ زانین بۆ ده‌مه‌كێ كێم ئه‌ز ژێ دووركه‌فتم و من گۆت دێ بێهنا خوه ڤه‌ده‌م لێ كاودان د باش نه‌بوون و نه‌چاربووم جاره‌كی دی ده‌ست ب كارێ خوه بكه‌م و ل ده‌مێ بۆری من هه‌موو جۆرێن جلكان كه‌ردكرن و دروین، لێ نوكه به‌س ئه‌ز جلكێن كوردی یێن زه‌لامان ب چه‌ندین مۆدیلان كه‌ردكه‌م و د درویم، و ل وه‌رزێ بهارێ ب تایبه‌ت ژی به‌ری نه‌ورۆزێ كارێ مه زێده‌تر لێ دهێت و داخوازی ل سه‌ر جلكێن كوردی زێده دبن.
