40 سالن ل سەر داران ب رێڤە دچیت
شاكر ئەتروشی:
سەباح عەبدولرحمان حامد سۆرچی، كو ب (سەباح خەنجەر) دهێتە نیاسین، ئاكنجیەكێ ناحیا بجیلێ یە، ژبەركو مرۆڤەكێ سۆحبەت خۆشە پتریا خەلكێ دەڤەرێ وی دنیاسن و هەموو دەما مالا وی یا پری مێهڤانە و ب مالەكا خانەدانا دەڤەرێ دهێنە نیاسین.
د سەرەدانەكا رۆژناما ئەڤرۆ دا بۆ مالا وی مام سەباح ل دەسنپێكێ ئەو چەندە دیاركر كا بۆچی دبێژنێ (سەباح خەنجەر) و گۆت: ل سالا 1992 من خەنجەرەك ب (500) دینارێن سویسری كڕی و هەتا نوكە یا دبەر منڕا ژبەر هندێ خەلك وە دبێژنە من، ژبلی ڤێ چەندێ من ئارەزوویا كۆمكرنا كەرستێن فولكلۆری ژی هەیە و هندەك جاران هەلبەستان ژی دنڤیسم و بەری چەند سالان بەرپرسێ لاوان ژی بووم.
ناڤهاتی گۆت: دژیێ هەڤدە سالیێ دا من خوە قێری رێڤەچوونا سەر دارا كر، ئانكو ئەڤە چل سالن سەر دارا ب رێڤە دچم و نوكە ئەز دشێم بۆ رێكێن درێژ ل سەر دارا ب رێڤە بچم، هەروەسا دشێم ب سەر دەرجا و جهێن بلند ژی بكەڤەم و دشێم پشت و پشت ژی ل سەر دارا بچم، هەروەسا دەواتێ ژی پێ بكەم.
